Diretór Jéral Sekretariu Estado ba Inguladade no Inkluzaun (SEII), Armando da Costa, hatete, partisipasaun iha vida politika foin atinji pursentu 38 (38%).

Tanba ne’e, instituisaun hotu atu promove direitu feto tenki haree mós ba prestasaun servisu nian.

“Enkuantu ita hare partisipasaun feto iha parlamentu 30% no sira hala'o knar importante involve mós komisaun sira nian ne'ebé hare ba lei no orsamentu ba politika nian" dehan nia iha salaun CNE, sesta (08/10).

Nune’e, SEII hamutuk ho parseria sira hala’o dialogo ida hodi rona rekomendasaun sira husi Governu no Parlamentu liu-liu membru rede feto no mós organizasaun sira ne’ebé tau matan ba feto.

Atu oinsa rekomendasaun sira ne’e bele konsidera mak sosiedade sivil sira bele kontinua halo nia papel oinsa tu kritiku ho Governu.

"Ita halo servisu parseiru kritiku ne'e intermus suplai dadus informasaun evidensia sira para ajuda Parlamentu no ajuda Governu halo desizaun ne'ebé bele fó resposta ba problema ne'ebe ita infrenta liu-liu partisipasaun feto iha Vida politika,”tenik nia.

Tuir nia, durante rede feto halo esforsu tomak hodi bele implenta lei ida kona ba partisipasaun feto iha vida ploitika, maibé dezafiu barak mak sira hasoru iha nia implemetasaun. Entaun, Governu tenke hare oinsa dezenvolvimentu sira ne'e  tenke promove balansu inkluzivu atu nune’e labele husik ida iha kotuk.

“Tanba ne'e, ita hotu tenke iha dever moral oinsa mak atu fó protesaun liu-liu asegura oinsa implementa lei sira no ba alokasaun orsamentu ba zeneru no inkluzivu,”nia akresenta.

Entretantu, Prezidente Grupo Mulheres Parlamentu Timor-Leste (GMPTL), Lidia Norberta informa,  liu husi peskizasaun ba livru ka freedown ba demokrasia iha Timor-Leste, hatudu partisipasaun feto iha politika ne’ebé reprezentante povu iha Parlamentu, Timor-Leste mós rejista as iha Azia.

Tanba ne'e, husu ba maluk feto sira nafatin hatudu espiritu matenek nian hodi hatudu ba mundu katak Timor-Leste mós bele.