“Governu la presiza kria tan fatin lixu, maibé responsabilidade iha ida-idak nia liman oinsa labele kria fo'er iha ita nia bairo ka uma oin no tenke tau hanoin ida katak, prepara balde aat ka karon ruma hodi tau fo'er ba laran bainhira kareta saneamentu ba rekolla,” dehan nia ba Online INDEPENDENTE, iha knar fatin, tersa ne’e (10/05).
Nia hatutan, bainhira komunidade sira hatoman aan soe fo’er arbiru, ho ida ne’e mak, sei fó impaktu ba sosiedade, no bainhira udan monu rai sei hamosu inundasaun.
Tanba ne'e, PAM husu ba komunidade hotu nia konsiensia atu labele soe fo'er arbiru, bainhira soe karik iha nia fatin, atu nune’e parte saneamentu bele rekolla.
Nune’e mós, nia husu, ba komunidade sira atu koopera ho Governu bainhira soe fo’er tuir regras ne’ebé estabelese ona katak, hahú soe fo’er komesa husi tuku 4 madrugada to’o tuku 7 dader no kalan hahú tuku 7 to’o 9, otl.
Entretantu, Prezidente Autoridade Munisipiu Dili ne’e, akresenta, Governu liu-husi Ministeriu Administrasaun Estatal (MAE) ho Autoridade Munisipiu Dili nafatin hili Tibar sai fatin soe lixu, tanba seidauk identifika fatin ida ne'ebé mak sei sai segunda opsaun ba fatin lixu.
Tanba ne'e, husu ba komunidade sira ne'ebé besik iha fatin ne’e, liu-liu komunidade sira iha Tibar atu labele sunu arbiru fo’e iha fatin refere, tanba ahi nia suar bele afeta ba ambiente tasi ne'ebé besik iha area mangrove nian.
