Ministru Justisa, Tiago Amaral Sarmento hateten, tuir lei nu.5/2016, 25 Maiu, kona ba estabelese prosedementu konsesaun ba indultu ho komutasaun pena, enkamina tiha ona pedidu sira ba Prezidente Republika iha loron 11 Abril 2022.
Nia haktuir, pedidu kona ba indultu ho komutasaun pena ne'ebé Ministeriu Justisa hato'o ba Prezidente Republika hamutuk ema na'in 17 maka sei hetan indultu.
"Agora ida ne'e kabe ona ba kompetensia Prezidente Republika no tuir Konstituisaun RDTL Prezidente Republika mak sei desidi atu fó indultu ka komutasaun pena, ne’e duni Ministeriu Justisa somente sai hanesan ponte atu fasilita no enkamina ba Prezidente Republika,"informa Tiago Amaral Sarmento ba Jornal Indenpende iha Parlamentu Nasional, (9/5).
Nia haktuir, krime ne'ebé prizoneiru hirak ne’e komete maka hanesan, tentativa homisidio, arma branca, ofensas corporais no forma agravada, danu com violência, maibé maioria kumpri ona 1/3 pena no balun pedidu atu komuta pena.
Nia klarifika, lei la permite ba sira ne'ebé komete krime bo’ot atu tama iha lista indultu. Sira ne’ebé hetan indultu ne'e komete krime ne'ebé ki'ik no nia pena ladun bo'ot, tinan lima (5) mai karik,"tenik nia
Nia informa, atu fó indultu ba prizoneiru ruma tenki hare ba nia bom komportamentu, pedidu husi diretor prizaun sira no hare mós ba sira nia kometasaun de pena no kompleta 1/3.
Maske antes ne’e, Diretór Estabelesimentu Prizional, Prizaun Becora, Joao Domingos hateten, parte prizaun Becora propoin prizoneiru hamutuk na’in 14 atu hetan indultu husi Prezidente Republika iha tinan ne’e.
“Ami propoin prizoneiru na’in 14 ba Governu atu hetan indultu husi Prezidente Republika iha 20 Maiu no lista haruka ona ba Ministeriu Justisa,” deklara nia iha momentu ne’ebá.
Iha parte seluk, Diretór Estabelesimentu Prisional, Prisaun Gleno, Nito hateten, Prizaun Gleno propoin lista dadur na’in 13 atu hetan indultu, Nune’e mós Diretór Estabelesimentu Prisional, Prizaun Suai, Julio Dias Ximenes informa, prizasaun Suai propoin prizoneiru na’in ida atu hetan indultu husi Prezidente Republika.
