Padre João de Deus hakotu iis ho idade 91, hafoin hala’o tratamentu saúde iha HNGV dezde iha loron 31 Agostu, molok ne’e hala’o tratamentu saúde iha Hospital IHEAL Medical Center, Malaysia.
Médiku ICU HNGV, Vong esplika padre João sofre moras komplikadu, durante iha Intensive Care Unit (ICU), médiku sira halo tratamentu ba antí infesaun no mós tratamentu atu suporta órgaun sira liuhusi tratamentu kritériu.
Tuir informasaun ne’ebé diáriu ne’e asesu, Doutór Mendes Pinto dehan amo João de Deus Mate tanba sofre moras multi órgaun failure iha parte pulmaun, fuan , rins no sibulutes Kromin.
Tuir planu, Mate isin amu salezianu ne’e sei lori husi mortuáriu ba hatuur iha sentru Formasaun Don Bosco Komoro, ohin (23/09), sei lori mate isin ba Fatumaka, Garuai, Baukau hodi hala’o prosesu fúnebre.
Amu João de Deus Pires, SDB, moris iha iha loron 15 Abríl 1928, iha Morais- Mirandela, Bragança- Portugál.
Tama ba Salezianu ho votus dahuluk nu’udar frater iha 24 Agostu 1947 no simu ordenasaun sai amululik iha 8 Jullu 1856. Tama iha Timor Leste iha tinan 1958 no iha tinan 1962 tama iha Baukau no funda saleziana iha Baukau inklui Colégio Fatumaka (Gariuai).
Molok ne’e,Prezidente Repúblika, Francisco Guterres Lú Olo, akompaña hosi Espoza Cidalia Lopes Nobre Mouzinho Guterres vizita João de Deus, SDB ne'ebé baixa iha Hospital Nasional Guido Valadares iha loron-9 fulan setembru.
Iha vizita Prezidente Repúblika hein katak padre João de Deus bele rekupera no hameno ba doutor sira atu tau matan nafatin Pe. Joâo de Deus nia saúde.
Molok ne'e, iha fulan Jullu 2019, Prezidente Repúblika vizita ona Pe. João de Deus ne'ebé halo tratamentu iha Hospital IHEAL Medical Center, Malaysia.
