Orsametu ne’ebé aloka ba MPKM ho total US$ 4.928.516 ho kategoria salariu vensimentu US$ 3.108.303, beins servisu US$ 1.770.213, transferensia publika liha, kapital menor US$ 50.000 no kapital dezenvolvimentu laiha.
Husi orsamentu ne’e aloka ba iha programa 510, funsionamentu dezenvolvimentu institusionál salariu vensimentu US$ 1.547.345, beins servisu US$ 1.238.258, transferensia publika laiha, kapital menor US$ 50.000 no kapital dezenvolvimentu laiha ho total US$ 2.835.603.
Programa A25, politika estratejia nasionál ho total orsamentu US$ 2.092.913 ho salariu vensimentu US$ 1.560.958, beins serbisu US$ 531.955, transferensia publika laiha, kapital menor laiha no kapital dezenvolvimentu laiha.
Ministru Prezidensia Konsellu Ministru (MPKM), Hermengildo Pereira, husu ba deputadu proponente ba proposta numeru 68 atu retira tanba laiha fatin atu hasai orsamentu ba programa catering.
“Catering Konsellu Ministru presiza duni. Ami agradese preokupasaun ho poupansa no seluk tan ne’e ita hotu nia preokupasaun, maka konsellu ministru jere catering ne’e ba hotu iha reuniaun konsellu ministru no reuniaun estraordinaria no ordinaria,” dehan nia.
Nia hatutan, debate iha parlamentu hanesan agora dadaun ne’e loron 10 tan no loron tolu iha jeneralidade no mós kuandu komisaun bolu membru governu para iha audensia, Konsellu Ministru mós providensia serbisu catering para tulun serbisu ida ne’e.
“Tanba ne’e maka deputadu sira mak iha poder ba votu mas lalikan altera para, se altera ne’e difikulta fali jestaun servisu konsellu ministru nia iha área de apoiu autor membru governu sesaun plenaria, sesaun parlamentar no sesaun komisaun permanente,” tenik nia.
Entretantu Deputadu Bankada FRETILIN, Antoninho Bianco hateten, nu’udar proponente ba proposta 68 sei la retira, tanba Governu mai ho ninia argumentu atu han, maibé atu dehan deit katak Parlamentu nu’udar orgaun soberanu segundu de’it mós iha ne’e la han.
“Hau la retira tanba sa, tanba justifikasaun mai afinal hodi atu han plenaria ida ne’e la han, governu mós tenke labele han tanba ita poupansa osan parlamentu orgaun soberanu plenaria komisaun la han, tanba ne’e mak ha’u la retira ne’e ba votasaun,” nia tenik.
Entretantu, proposta númeru 68, titlu Prezidensia Konsellu Ministru, programa funsionamentu institusional ho dotasaun inisial US$ 2.835.603, husu atu hasai tiha rihun $ 125, husi deputadu proponente Antoninho Bianco, Joaquim dos Santos no David Dias Ximenes “Mandati”.
Justifikasaun sumariu liga ba prinsípiu uza osan ho kuidadu tanba fonte finansiamentu ba OJE barak liu mai husi fundu mina-rai kompra husi reseita domestika tinan-tinan.
“Durante ne’e ami akompana osan iha rubrika catering ne’ebé kada instituisaun governu aloka difisl ba parlamentu atu kontrola,” sita proposta.
Tuir proposta, proponente hatene katak Prezidensia Konsellu Ministru nu’udar ministru ho esperensia boot tenke sai ezemplu mós atu poupa osan iha instituisaun ne’ebé nia dirije.
“Nune’e ami proponente husu iha rubrika catering atu halo redusaun hanesan ami haktuir ba iha proposta ne’e,” tenik nia.
Nune’e, iha rezultadu votasaun ba proopsta númeru 68, afavor 25, kontra 37 no abstensaun 2, ne’ebé proposta ne’e la pasa.
Observasaun diáriu ne’e, iha proposta lima maka mai husi Bankada FRETILIN no PLP maibe proposta haat retira, proposta ida 68 maka mantein ba votasaun maibé la pasa, tanba governu rasik la simu.
