Eis Ministru Edukasaun ne’e dehan, ministériu balun iha VIII Governu Konstitusional to’o ohin loron seidauk iha lei organika maibé halo ona restruturasaun ba diretór sira.

Tuir deputadu ne’e, desizaun membru governu hodi halo re-estruturasaun ne’e nu’udar politizasaun ba makina estadu, tanba la’o la tuir dalan.

“Lei organika Ministeriu mak sai hanesan baze fundamental ne’ebé atu regula serbisu ministériu nian no politika saida mak governu atu atribui ba ministériu ne’e tenke refleta iha lei ne’e”, dehan Kalohan iha PN, horisehik.

Eis Ministru ne’e husu mós ba ministériu ne’ebé sei uza lei organika governu anterior atu informa ba Konsellu Ministru hodi legaliza, labele nonook de’it no halo ona re-estruturasaun.

“Ha’u uluk assume pasta hanesan Ministru Komersiu no Industria, ami lori fulan ida hodi prepara lei organika, dekretu governu no programa lori mai iha PN hetan aprovasaun, nune’e ami husi ministériu ida-idak haka’as aan halo fali lei organika ministériu nian iha fulan ida nia laran de’it”, dehan nia.

Iha fatin hanesan, Vise Prezidente Bankada FRETILIN, Josefa Alvares Pereira hatete, kestaun lei organika ne’e nu’udar konsekuensia husi koligasaun tanba partidu ida-idak mai ho nia interese nune’e sei dada malu.

“Tuir loloos ne’e lei organika ministeriu nian ne’e tenke iha atu nune’e regulariza serbisu, la’e diretór no asesór sira sei hada’u-malu kompetensia,” deklara nia.

Tuir nia, lei organika ne’e importante atu garantia funsionamentu ministeriu hodi atribui kompetensia ba jestór sira atu hala’o sira-nia serbisu.

Atu solusiona asuntu ne’e, nia dehan, partidu governu mak tenke fó sujestaun ba governu hodi halo ona lei organika ne’e atu bele apoiu politíka governu nian.

Entretantu, Prezidente Bankada CNRT, Duarte Nunes hatete, rekoñese katak ministériu balun to’o ohin loron seidauk iha lei organika.

Loloos, tuir nia, Primeiru Ministru mak tenke ejize ba ministru sira atu bele aselera prosesu ne’e hodi fó kompetensia ba sira atu hala’o serbisu.

“Ha’u rekoiñese katak lei organika ministeriu balun seidauk iha ne’e problema ida, maibé ha’u mós hakarak husu tan sá mak seidauk iha?, ne’e kompetensia Xefe Governua nian,” dehan Duarte.

Deputadu ne’e hatutan, bainhira lei organika seidauk iha Ministru labele monta ema iha ninia gabinete, no karik sei uza lei organika anterior signigika tenke mantein ema sira ne’ebé molok ne’e assume kargu xefia tanba sei iha validade.

“Sira labele uza ema sira ne’ebé foin tama ikus ne’e tanba seidauk aprovadu. Sira tenke uza lei organika anterior ne’ebé sei validu hela ne’e, se diretór ne’ebé asina surat ruma ninia naran tenke tama iha lei organika anterior ne’ebé sei validu ne’e,” Duarte esplika.