Tuir Joaquim, prosesu ne’ebé la transparensia ne’ebé Timor Gap halo sei lori risku boot no sei sai projetu failadu hanesan ho projetu sira seluk ne’ebé halo ona.

“Esperiensia hatudu bebik ona projetu ne’ebé mak governu sira halo subar-subar de’it, la lui husi prosesu aprovizionamentu, ikus mai sempre hamosu prejuizu ba estadu,” dehan deputadu Joaquim liu husi konferensia impensa iha sala Bankada FRETIIN, Sesta (10/05).

Deputadu ne’e fó ezemplu hanesan ho projetu estrada (jalan tol) iha Suai ne’ebé la to’o tinan ida naksobu ona, no projeitu portu Naval Hera ne’ebé gasta osan tokon $14 ho sistema ajudikasau direita maibé ikus mai la uza ba buat ida.

Ho esperensia hirak ne’e, deputadu ne’e ezije ba govenu atu aprezenta detallu prosesu ba kontratu konstrusaun Portu Beasu ba Parlamentu Nasionál.

Iha fatin hanesan, Prezidente Bankada CNRT, Duarte Nunes konsidera ezijensia FRETIIN pozitivu tanba FRETILIN hahú preokupa ona ho konstrusaun portu Beasu.

“Antes ne’e FRETILIN lakohi atu iha dezenvolvimentu iha Beasu, sira la preokupa, maibé agora sira hahú preokupa signifika sira iha interese hakarak hatene ona nina prosesu,” dehan deputadu ne’e.

Tuir nia, ida ne’e dalan di’ak ida atu bankada FRETILIN no Timor Gap bele koalia ba malu kon-ba prosesu tomak nune’e sira bele intende malu tanba saida mak kontratu ne’e la’o hanesan ne’e.