Prezidente Repúblika, José Ramos-Horta, agradese ba apoiu hotu husi ONU no nasaun membru ASEAN sira nia eforsu hodi simu Timor-Leste sai membru ASEAN ba dala 11.

Nia dehan, ba Sekretáriu Jerál ONU, António Guterres, iha relasaun metin ho atuál Prezidente Indonézia, Joko Widodo, nune’e nia bele negósia hodi Timor-Leste adere lalais ba ASEAN.  

"Sekretáriu Jerál ONU António Guterres sempre prontu atu haré saida mak Timor-Leste presija nia apoiu, bele dala ruma apoiu diretamentu husi ONU maibé mós bele liu husi koalia ho líder sira iha mundu, favór tau matan ba Timor-Leste. Tanba António Guterres relasaun metin ho Prezidente Repúblika Indonézia Joko Widodo, nu’udár mós Prezidente ba ASEAN no G20 iha tinan 2023, ne’eduni ita presija buat ruma husi Sekretáriu Jerál ko’alia ho líder Europeiu sira no G20, nia prontu atu halo loby ba Timor Leste, nia sempre rai Timor Leste iha nia ulun no fuan,” dehan komunikadu ne'ebé diáriu ne’e asesu husi Palasiu Prezidensiál horisehik.

Xefe Estadu konsidera, Sekretáriu Jerál ONU, hanesan ema ida di’ak tebes, lider ne’ebé iha kualidade no koñesidu hanesan ema relijiozu, nu’udár Katóliku dezde hanesan Primeiru Ministru Portugál, iha fuan di’ak tamba ne’e mak eleitu hanesan lideransa máximu ONU ho unanimidade tutuir malu.

Tanba, uluk iha tempu difísil 1999, hanesan Primeiru Ministru Portugál António Guterres halo pressaun maka'as ba Prezidente Amerikanu Bill Clinton no líder Europeiu sira atu buka konsensu iha Konsellu Seguransa ONU, nune’e misaun forsa manutensaun ba fame INTERFET tama iha Timor Leste.

Entretantu, iha enkontru ne’e, Sekeretariu Jerál ONU apresia mós Xefe Estadu foun Timor Leste ba períodu 2022-2027, Prezidente RepúblikaJosé Ramos Horta.

Alende ne'e mós, Prezidente Repúblika José Ramos Horta hasoru malu ona ho Primeiru Ministru Kambodia Hun Sen, no líder mundiál sira saluk hodi ko’alia mos kona-ba prossesu Timor Leste adere ba ASEAN.