Reprezentante OMS iha Timor-Leste, Arvind Mathur, hatete katak aumentu kazu dengue daudaun ne’e sai preokupasaun boot, tanba ne’e eskola sira presiza foti medida preventivu hodi hapara transmisaun.

“Eskola sira tenke sai fatin ne’ebé seguru ba estudante sira, no ida ne’e signifika bele proteje sira husi dengue mós. Moras dengue da’et lalais, no fatin sira ne’ebé nakonu ho ema hanesan eskola bele sai fatin fasil ba dengue atu da’et. Maibé ho medida sira ne’ebé loos, ita bele hapara infesaun molok nia hahú,” dehan Arvind liu husi pájina ofisiál OMS, Kinta (26/02).

Nia hatete katak prevensaun tenke hahú husi salaaula to’o kantina no área hotu-hotu iha eskola.

Tuir nia, asaun ki’ik sira ne’ebé halo ho konsisténsia bele halo diferensa boot ida ba seguransa estudante sira.

OMS esplika katak dengue hanesan moras ida ne’ebé hada’et husi susuk aedes aegypti ne’ebé infetadu ho vírus dengue.

Susuk ne’e bele moris maski iha bee ho kuantidade ki’ik, tanba ne’e importante atu elimina fatin ne’ebé bee bele nalihun.

Medida sira ne’ebé rekomenda inklui estudante sira uza kreme ka lotion anti-susuk, uza roupa liman-naruk, no rega ai-moruk atu hamate susuk iha tempu ne’ebé loos.

Eskola sira mós presiza hamoos tanki bee, vazu aifunan, no valeta sira semana ida dala ida, taka tanki bee nia matan, no soe botir, plástiku ka materiál seluk ne’ebé bele rai bee.

OMS enfatiza katak kombate dengue presiza kolaborasaun entre eskola, inan-aman no komunidade atu asegura ambiente ne’ebé limpu no saudavel, nune’e estudante sira bele aprende ho seguru no livre husi ameasa moras dengue.