Okupante Antonio Mendonça hateten, nia pronto atu hamamuk no sai husi fatin refere, maibé tenke sai ho dignu.
“Ami prontu koopera ho Governu hodi sai husi fatin ne'e, maibé ho dignu. Ami kontribui ho Estadu atu halo dezenvolvimentu ba ita-nia rai, Estadu atu lori ami ba ne'ebé de'it ami prontu, maibé ha'u preokupa maka oinsa maka ha'u-nia famlia no sasan sira ne'e, Governu bele tula ka la’e? ba fatin ne'ebé ami atu ba hela bá,”dehan nia ba Online INDEPENDENTE, iha areadór ESG 04 Setembru, Balide, Dili, tersa (10/06).
Nia hatutan, durante ne’e seidauk iha notifikasaun husi parte Governu liliu Ministeriu Edukasaun nian.
“To'o agora Governu seida’uk fó notifikasaun ruma ou fó data fixu mai ami atu bele sai husi fatin ne'e,”tenik nia.
Iha sorin seluk Diretór Eskola 04 Setembru UNAMET Balide, Dili, Sergio Alfredo da Cruz husu ba Governu relevante, atu bele kolabora ho okupante areador eskola sira atu bele hamamuk fatin refere, tanba movimentu komunidade sira afeitada tebes ba prosesu aprendijazen estudante sira nian.
Nune’e mós Dirijente Eskola ne’e dehan, fatin ne’e nu’udar partrimonio Estadu, nune’e tenke proteje ho diak.
“Fatin ne'e fatin patrimoniu estadu nian, nune’e parte eskola husu ba Governu no parte kompetente atu koolabora hamutuk ho komunidade atu hamamuk fatin, iha area eskola nian, tanba komunidade ninia movimentu ne'ebé la’o ho motor no kareta ba mai iha area ne'e, fó influensia maka'as ba iha estudante sira nia prosesu aprendijazen. Tan ne'e ha'u husu ba Ministeriu Edukasaun atu bele rezolve problema hirak ne'ebé ami hasoru, liu-liu bainhira komunidade hamamuk fatin ne'e husu para bele halo moru haleu area eskola nian, atu nune’e estudante sira bele seguru no ita tau sasan iha area eskola nian la bele lakon,”Diretór Eskola ne’e husu.
Entretantu, Dirijente Eskola ne’e mós hatutan, antes ne’e ekipa husi Munisipiu Dili no ekipa konjunta SEATOU nian halo ona komunikasaun ho komunidade sira ne’ebé okupa hela areadór eskola refere.
“Parte munisipiu Dili ekipa SEATOU balun mai ona iha fatin ne'e hodi komunika malu ho komunidade sira kona-ba oinsá atu hamamuk fatin ne'e, ne'ebe bainhira ha'u dada-lia ho komunidade, sira hato'o mai ha'u katak sira prontu no hein dei't karta husi Governu liu-husi Xefe Suku, entaun sira bele sai ona ,”hakotu nia.
Entretantu, komunidade ne’ebé okupa areadór Eskola Sekundaria Jeral 04 Setembru UNAMET Balide, Dili, hamutuk uma-kain 6.
