“Valór nominál dolar amerikanu bilaun $1,71 ne’e mak pela primeira vez aas liu iha istória Timor-Leste desde país ne’e restaura ninia Independénsia no konsege ultrapassa ezekusaun reál iha tinan 2016 iha ne’ebé Governu konsege ezekuta $1,63 bilhões,”haktuir komunikadu ne’ebé Online INDEPENDENTE asesu, sesta ne’e.
Tuir komunikadu, iha tinan 2017, 2018 no 2020, Timor-Leste hasoru kresimentu ekonómiku negativu kauza husi impasse polítiku ne’ebé naruk, pandemia Covid-19 no efeitu mudansa klimátika ne’ebé halo konke ekonomia monu ba negativu 8,3% iha 2020.
Maibé iha tinan 2021, ekonomia Timor-Leste konsege krese ho kresimentu pozitivu 2,9%. Kresimentu pozitivu akontese tanba Oitavu Governu Konstitusionál trasa medidas importante sira hanesan, apoiu ba empregu, moratoria ba kédito, izensaun propinas ba estudante ensinu superiór, subsídiu internet ba estudantes ensinu superiór, sosa produtu alimentár husi produtór lokál, finansiamentu operasaun Sentru Integradu Jestaun Krize, pagamentu traballadór liña-frente inklui pagamentu sesta bázika.
Enkuantu, medidas hirak ne’e Governu trasa ho objetivu atu bele hakmaan situasaun sosiál no ekonomia empreza, traballadór, família sira no buka atu rekupera ekonomia.
Durante tinan rua ikus, ritmu ezekusaun OJE mós la’o di’ak ona tambá iha Estabilidade Polítika no Estabilidade Governativa ne’ebé fó biban ba aprovasaun Lei Enkuadramentu Orsamentu Jerál Estadu no Jestaun Finanseira Públikas no Dekretu Governu kona-ba Ezekusaun OJE hodi fasilita ezekusaun OJE 2022 ne’e rasik.
Iha tinan 2021, Governu konsege ezekuta $1,44 bilhões. Ida-ne’e mak segundu mellór ezekusaun desde tinan 2016, maske Governu aplika restrisaun oioin ne'ebé limita sirkulasaun ema no sásan sira kauza husi pandemia Covid-19, inundasaun no efeitu mudansa klimátika.
Ho ezekusaun reál OJE ne’ebé aas durante tinan rua ikus ne’e hatudu katak kapasidade ezekusaun orsamentál iha kada linhas ministeriais mós aumenta sa’e. Atu sustenta ritmu ezekusaun orsamentál ne’ebé aas ejize estabilidade polítika no estabilidade governativa inklui investimentu kontínuu iha área rekursus umanu, iha sistemas no enkuadramentu legais.
Entretantu, bainhira iha estabilidade polítika no estabilidade governativa no ho ritmu ezekusaun orsamentál no kresimentu hanesan ne’e, maka ekonomia Timor-Leste sei bele rekupera totál iha tinan 2024 no país ne’e sei tama filafali ba iha trajetória kresimentu ekonómiku no dezenvolvimentu sosiál.
