Mosu esperansa husi sosiadade sivil atu membru governu ne’ebé nia mandatu atu remata ona hodi aprezenta ho responsabilidade relatoriu servisu durante sira-nia mandatu.

"Ultima enkontru Konsellu Ministru nian sei akontese iha 7 Juñu loron ne'ebé Tribunál Rekursu sei fó sai konfirma ninia rezultadu no sai iha Jornál da Repúblika," informa PM Taur 24 Maiu liu ba.

Hafoin enkontru ikus ne’e, PM Taur hatete, Govenu ne’ebé nia lidera hein de'it ona hodi intrega no halo tranzisaun ba governu foun.

Ba enkontru ikus ne’e, Diretór Ezekutivu Luta Hamutuk, José Alves da Costa hein katak membru governu idaidak tenke responsabiliza servisu ne’ebé sira halo durante tinan lima.

"Ha'u hanoin enkontru ikus ba iha Konsellu Ministru saida mak parte husi Luta Hamutuk fó hanoin ida mak tenke iha responsabilidade, tanba hanesan uluk durante tinan lima liu ba, até dadus sira iha komputador laran mós tenke apaga hotu, entaun governasaun ne'ebé mai hahú ho buat foun, ida ne'e labele akontese," dehan José iha nia knar-fatin, Palapasu, Tersa (06/06).

Tanba, tuir nia, servisu hirak ne’ebé ministériu sira halo estadu selu kotu ona liu husi sira-nia salariu. Tan ne’e laiha razaun bainhira sira-nia mandatu remata, sira lori fali dokumentu ba uma.

“Se kopia, sim, mais orijen ne'e tenke rai iha ne’ebá tanba Governu foun ne'ebé mai mós presiza atu haree saida mak durante tinan lima Governu sesante halo no saida mak la di'ak atu hadia no saida mak di'ak atu kontinua, ne'e tenke iha, ida ne'e presiza file,” dehan nia.

MG atual, nia hatutan, tenke intrega sira-nia relatoriu tinan ikus nian no relatoriu tinan lima ninian durante sira nia mandatu, no esplika mós ba membru governu foun sira kona-ba servisu hirak ne’ebé halo ona.

“Tenke onestu nu'udar Timor-oan, labele dehan mandatu hotu ona bé ida fali tama ne'e mai hanesan inimigu, la liga malu tan, talves ida mai ne'e husu informasaun ba ida sesante dala-ruma la hatene, ida ne'e la di'ak, situasaun ne'e tinan uluk uluk, 2012 no 2017 ba kraik, ne'e sempre akontese iha ministériu sira.”

Tan ne’e, husu ba MG atual atu labele repete situasaun sira ne'ebé akontese ona.

Aprezenta Relatoriu Subsidiu 200-Sesta Bázika ho Justu

Diretór Ezekutivu Luta Hamutuk, José Alves da Costa, husu mós ba Governu Konstitusionál daulu atu aprezenta relatoriu subsidiu $200 no Sesta Bázika ho justu, tanba programa hirak ne’e hasai osan ne’ebé boot, maibé uma-kain balun seidauk simu.

“Osan aprova bazeia ba total uma-kain ne'ebé mak iha Timor mais nusa mak balun simu tiha ona, balun seidauk simu. Transporte atu ba fahe mak laiha ka ekipa ka ema seidauk simu mak laiha ka ema atu simu ne'e mak liu tiha ona mak restu ne'e la simu? ne'e presiza investigasaun par bele hatene loloos,” dehan José.

Ho nune’e, nia hatutan, governu foun mai bele rezolve subsidiu $200 no Sesta Bázika ne’e.