PJR José Ximenes hatete, molok ne’e nia asume kargu nudar Prokudaradór Jerál durante periodu rua tutuir malu, husi tinan 2013 to’o tinan 2017 no kontinua fali husi tinan 2017 to’o tinan 2021.
Nune’e, aban termina ona nia mandatu nudar PJR iha Timor-Leste no sei la extende tan nia mandatu, tanba lei estatutu PJR nian la premiti atu ema ida asume kargu PJR to’o periodu tolu.
Ho ida ne’e, PJR mai hasoru Prezidente Republika Francisco Guterres “Lu-OLo” hodi hato’o gratidaun no liafuan agradesementu, hodi remata nia responsabilidade nudar PJR ne’ebé sei termina iha loron 28 fulan-abril tinan 2021.
“Ha’u simu mandatu nudar PJR iha loron 28 fulan-abril tinan 2017 durante tinan haat, iha momentu ne’ebá Presidente Republika Taur Matan Ruak nia mandatu mak fó pose, maibé ohin ha’u mai hodi fó agratidaun no lia fuan agradesementu ba Presidente atual tanba ha’u servisu hamutuk ho nia (PR) kleur liu,”dehan nia hafoin remata enkontru ho PR, iha Palasiu Presidensiál, Bairo Pite, Dili, tersa ohin (27/04).
PJR ne’e senti orgullu no prestizozu bainhira assume knar durante tinan ualu (8), tanba bele servisu hamutuk ho lider rezistensia na’in rua (2) ne’ebé sempre fó nia paoiu iha nia mandate durante lidera instituisaun judisiariu PJR nian.
Nia akresenta, lider na’in rua (2) iha pensamentu ne’ebé la hanesan maibé sira sempre tané as interese estadu nian liuliu kona-ba sistema judisiariu iha Timor-Leste.
Tanba ne’e loron aban (28/04) hanesan loron ikus ba PJR atu assume nia mandate no nia rekomenda mós ba Parlamentu Nasional hodi nomeia ema foun atu hatutan servisu judisiariu ne’ebé lao hela.
Ho nune’e atu hili Prokurador Jeral Republika foun ne’e kompetensia Parlamentu Nasional nian hafoin submeter ba Prezidente Republika.
Nia mós husu ba publiku atu servisu hamutuk ho PJR foun hodi mellora servisu judisiariu iha Timor-Leste sai dika liu tan iha futuru.
Tuir Konstituisaun RDTL, artigu 86, fó kompeténsia ba Presidente Repúblika hodi nomea Prokuradór Jerál Repúblika ba mandatu tinan haat (4).
Prokuradór Jerál ne’e, mós atu lidera Konsellu Superior Ministériu Públiku (KSMP), ho nia membru kompostu, husi vogál na’in haat, hanesan na’in rua husi sira ne’e dezignadu, ida husi Prezidente Repúblika no ida seluk husi Governu, no na’in rua eleitu, na’in ida hosi Parlamentu Nasionál, no ida seluk eleitu husi majistradu sira.
Jornalista:Camilio de Sousa
Editor:Jose Sarito Amaral
