Portavoz Jeral FMTL Novelino dos Santos informa, hafoin hasoru-malu ho Provedoria Direitus Umanus no Justisa (PDHJ) iha Kuarta (05/08), FMTL prepara ona karta keixa hodi hato’o ba instituisaun kompetente sira seluk.

Nia dehan, iha Sesta, ohin, ekipa FMTL sei hato’o karta keixa ba Komisaun B PN trata asuntu defeza no seguransa, Ministeriu Publiku (MP), Komisaun Funsaun Publika (KFP), no Komandu Jeral PNTL.

“Ami-nia ezijensia mak husu atu loke investigasaun no ami hakarak atu hatene justisa loloos mak ida ne’ebé, sera que atendimentu iha edifisiu publiku ne’ebé mak foin daudauk akontese iha Ministériu Justisa ne’e tuir duni prosedimentu ka lei Funsaun Públiku nian ka lae,” dehan Novelino ba jornalista INDEPENDENTE iha Asosiasaun HAK, Farol, Kinta (06/08).

Tuir nia, FMTL mós ezije no hakarak atu hatene loloos, PSIK halo duni funsaun tuir duni sira-nia papel ka lae, tanba ekipa husi FMTL ba la hasoru Xefe Gabinete MJ, maibé hasoru fali ekipa PSIK.

“Ami preokupa, tanba ami ba atu hasoru Ministru Justisa hodi husu justisa, maibé ami hetan fali injustisa,” dehan nia.

Tanba ne’e, nia hatutan, FMTL husu ba parte kompetente sira atu bele haree loloos aktu ne’ebé PSIK halo ne’e parte husi demokrasia ne’ebé durante ne’e Timor-Leste deklara ho orgullu ba mundu ka lae.

“Iha demokrasia ne’e, ita hotu hanesan iha lei nia okos, agora, buat ne’ebé sira halo ne’e tuir lei ka lae?.”

“Ha’u hanoin, atendimentu ne’ebé sira halo ne’e la merese tanba atendimentu ne’e dezumanu, la konsidera ema seluk, la respeita mos ema-nia opiniaun. Iha momentu hasoru-malu, molok atu koalia, ami husu lisensa, mais sira nafatin hatudu sira-nia brutalizmu no ameasa,” dehan nia.

Tuir akademista ne’e, durante ne’e sira hasoru ona instituisaun estadu lubuk ida hodi hato’o sira-nia protesta ba asuntu balun, maibé nunka simu atendimentu ne’ebé dezumanu hanesan akontese iha edifisiu Ministériu Justisa.

“Orgaun soberanu hotu ami ba hasoru la halo ami hanesan ne’e. Instituisaun hotu-hotu ami ba sempre atende ami ho di’ak, so uniku Ministériu Justisa de’it mak atende ami ne’e oin-seluk loos no foun ba ami,” dehan nia.

Tan ne’e, nia afirma, FMTL sei kontinua ezije ba autoridade kompetente atu haree aktu husi PSIK ne’e hodi bele responsabiliza sira-nia hahalok.

“Favor ida, tenke kondena pesoal PSIK ne’e tanba nia hahalok ida ne’e la respeita valor umanu, koko atu hamonu ema seluk ninia integridade hanesan sidadaun ida husi rai ne’e,” katak nia.

Entretantu, molok ne’e, ekipa husi MJ ne’ebe reprezenta husi Adjuntu Diretór PSIK Adino N. Cabral iha enkontru ho reprezentante manifestante sira halo asaun ameasa no trata.