Tanba ne'e, sira husu Governu sentral ho autoriade Rejiaun Administrativu Espesial Oekuse Ambenu atu transporta sira fila ba moris fatin.
Zeca relata, kuaze estudante 200 iha Dili laiha ona osan hodi selu kos tanba ne'e sira halo ona proposta hodi hato'o ba Ministru Telekomunikasaun no Telekomunikasaun hodi autoriza ró Sucsess atu tula sira fila ba Oekuse.
"Ami halo esforsu oin-oin kuaze fulan rua liu ona nun'e ami ezijé ba Governu fasilita ami hodi transporta ba Oekuse tanba hahan no osan laiha ona hodi selu kos, ami nia ezizensia aseita husi Ministru Transportasaun no Telekomunikasaun hodi autoriza ró bele tula ami ba Oekuse maibé Presidente autoridade mak la autoriza fali estudante sira ba Oekuse tanba dehan fatin Karantina iha Oekuse laiha," dehan Zeca, iha edifisiu ZEEMS-RAEOA, Palapasu Dili ba Jornalista Online Independente, Tersa (18/05).
Nia informa katak, tanba saida mak Presidente Autoridade RAEOA Arsenio Bano la autoriza estudante sira ba Oekuse. Entertantu Ministru Transporte no Telekomunikasaun aseita estudante sira bele ba Oekuse.
“Ministru aseita importante mak tenke tuir teste Swab, no rezultadu negativu husi Covid-19 mak bele ba no tenke iha guia da Marsa, regra sira ne'e ami tuir hotu ona maibé dehan labele ba Oekuse tanba seidauk iha autorizasaun husi Presidente RAEOA antaun Governu sentral no Autoridade RAOA durante ne’e laiha liña kordinasaun,”dehan afirma.
"Husu ba Presidente Autoridade RAEOA favor servisu hamutuk ho Governu Sentral hodi Autoriza Ami atu tuir ro Sucsess ne'ebe tuir planu sei tula Sesta Bazika ba Oekuse iha semana oin, Ami labele kontinua moris iha Dili tanba kuaze studante 200 resin iha Dili hela iha Kost no osan laiha ona atu selu,favor rona Ami nia halerik tanba Ita boot sai Presidente RAEOA ba Povu Oekuse tomak”.
Entertantu estudante hirak ne’e deside toba iha edifisiu RAEOA hodi hein solusaun husi Presidente RAEOA.
Molok ne’e, Presidente RAEOA, Arsenio Bano bandu estudante sira husi Dili ba Oekuse tanba lakohi hada'et Covid -19 ba povu Oekuse, no fatin karantina la sufisiente.
Iha Fatin hanesan, Deputada Lucia Taiqi husi partidu CNRT promete sei buka solusaun, maibé husu ba estudante sira atu maintein displina iha ida-idak nia nafatin.
Nune'e, kuarta aban nia levanta kazu ne'e ba Parlamentu Nasional hodi buka solusaun imediata atu ró bele tula estudante sira ba Oekuse iha tempu badak.
Nia informa ba Oekuse oan sira iha Dili, mantein kumpri regulamentu Covid-19 ne'ebe Organizasaun Mundial Saúde (OMS) no Ministériu Saúde (MS) aplika iha Timor-Leste hodi habadak sirkulasaun Covid-19.
Jornalista: Camilio de Sousa
Asistente Editor: Saturnina da Costa
