Ministra Saúde (MdS), Odete Maria Freitas hatete, Governu liuhusi Sentru Integradu Jestaun Krize (SIJK) kompostu husi Seguransa PNTL sei obriga sidadaun atu halo swap, atu nune’e labele husik povu mate ba Covid-19.
“Iha ne'ebá lidera husi Primeiru Ministru inklui seguransa hotu, ne'e signifika, to’o situasaun ida ne'e, ita obriga, tanba ita hatene, iha grafiku moras Covid-19 nian ne'e sa’e maka’as iha Dili laran ne'e, se ita la obriga maka, signifika ami hakarak imi mate,”dehan nia iha Salaun Novo Turizmu, Kinta (6/5).
Ministra esplika, maneira simplis atu bele prevene surtu Covid-19 mak, mantein uza maskára, nafatin fase liman, distansia sosiál, no labele halo agrupamentu.
Tanba ne’e, atividade screening ne’e ekipa vijlansia saúde la’o hela, atu asegura katak, ema hirak ne’ebé la’o ba mai ne’e virus la hela ho nia isin, se virus ne’e hela iha nia isin, tenke iha konsiensia atu izola an provizoriamente.
Nia informa, dalan ba izolamentu nian, bele izola an iha izolamentu hotu ne’ebé MS prepara, bele mós halo izolamentu iha ida-idak nia uma bainhira uma ninia kondisaun di’ak no tama kategoria duni.
“Importante, bainhira pozitivu ne’e hela iha uma, labele la’o ba la’o mai atu nuene’e labele hada’et virus ne’e ba iha ema seluk, no ami mós lakoi imi ba mai iha dalan laran, maske mehar inus metin,”dehan nia.
Bainhira iha karta pedidu ba iha autorizasaun izolamentu iha uma, maka ekipa pilar SIJK nian, sempre ko’alia atu bele asegura uma na’in, la’o tuir kriterias balun ne’ebé maka iha ona, no ema refere tenke disiplina, labele halo kontakta ho familia ne’ebé negativu no labele sai ba mai.
“Maibé ida ne’e depende ba iha sidadaun ida-idak, se sira hakarak transmite moras ne’e ba ema prontu, maibé se la hakarak maka, husu atu ajuda malu husi parte entidades hotu”.
Entretantu, Primeiru-Ministru Taur Matan Ruak, hateten teste swab ne’e di’ak ba ema hotu nia moris, tanba ne’e tenke koopera,.
“Ha’u hanoin ne’e ba ita hotu nia di’ak, ha’u hanoin ita tenke koopera, ha’u halo swab test ne’e dala haat ona, aban atu ba Balibo sira dehan; Primeiru Ministru atu ba kondisaun tenke swab, ha’u dehan ha’u siap, prontu atu swab, tanba-sa mak sidadaun sira lakoi koopera ne’e ba ita-nia moris ne’e, sei ita hakarak moris tenke sakrifisiu, ne’ebé ha’u husu inan-aman sira, Governu la’ós bulak atu halo at ba ita nia sidadaun sira, buat ne’e di’ak i lakoi sidadaun sira mate, tanba dadaun ne’e ita mate na’in haat ona,” informa Primeiru Ministru Taur Matan Ruak ba jornalista sira hafoin enkontru semanal ho Xefe Estadu.
Molok ne’e, ekipa Vijilansia Saúde hamutuk ho autoridade seguransa sira halo surpreza pasarevista ba komunidade Dili ne’ebé halo movimentu iha kapital Dili.
Iha asaun pasarevista ne’e, prende komunidade sira balun no obriga halo teste swab, maibé komunidade sira la satisfas no rejeita ho atuasaun ne’e.
Asistente Editor: Saturnina da Costa
