Negosiante kiik hanesan fa’an produtu lokal sira hahú halerik, tanba sira nia produtu lokal la folin ona, hafoin rezolusaun Governu bandu ema nia movimentu no blokea dalan sira iha kapital Dili.

Tuir observasaun Online Independente, tersa ohin (4/5), iha merkadu Taibesi no Manleuana hatudu katak autoridade seguransa husi Munisipiu Dili nian akompaña husi PNTL blokea dalan merkadu laran no obriga negosiante sira taka atividade fa’an sasan ne’ebé laos nesesidade bazika.

Negosiante Merkadu Taibesi, Jose Augustino hatete, hafoin rezolusaun Governu relasiona ho pandemia Covid-19, produtu lokal fa’an la folin kompara ho tinan kotuk nian. Iha tinan kotuk rendimentu kada loron bele hetan minimu $40, maibé ba tinan ne’e tuun ba maximu $10.

“Produtu sira ne’ebè ami hatama mai merkadu taibesi ami ba sosa iha fronteira Tasi-talu dalan tama sai,”nia hateten.

Iha fatin seluk, negosiante produtu lokal iha merkadu Manleuana, Jozito Gomes Silva  mós hatutan katak, Governu tenke kria mekanismu oinsa bele loke dalan ba merkadu manleuna, atu nune’e negosiante sira bele halo movimentu kompras modo husi komunidade sira.

Entretantu Gregorio das Dores nuudar negosiante fa’an na’an iha merkadu Manleuana mós lamenta tebes tanba na’an la folin.

Aliende iha merkadu sira, jornalista Independente mós halo observasaun ba loja sira ne’ebé fa’an nesesidade bazika iha kapital Dili,hanesan loja W FOUR no Lola Agrikultura.

Kompradór Mario Soares sente katak halo kompras ba produtu lokal iha loja fasil liu duke iha merkadu sira, tanba tuir nia katak autoridade seguransa sira impede movimentasaun ba merkadu liuhusi blokea dalan, no halo check point.

Tuir nia katak, sosa produtu lokal, hanesan feuk ropa no lis, repoilho, senhoras, modo mutin dadauk barak liu iha loja no seguru liu.

Situasaun ida ne'e akontese mós ba Peskadór sira hanesan Nando Silva iha area tasi ibun Farol. Iha konfiamentu obrigatóriu, nia kontinua buka ikan fa’an hodi nune'e nia familia bele aguenta moris.

Nando triste ho rendimentu  ba tinan ida ne’e tun liu kompara ho tinan kotuk. Iha tinan kotuk  nia rendimentu kada loron maximu hetan $100, maibé ba tinan ne’e rendimentu tun ba $20.

“Dau-daun ne'e buka osan susár, tanbá Governu deside serka sanitária iha kapitál Díli, hodi limita ami nia servisu hanesan peskador iha tasi laran. Maske nune'e ikan ne'ebé mak ami hetan seidauk barak,”dehan nia.

Iha fatin hanesan, Online Independente mós halo observasaun jerál ba merkadu sira iha kapital Dili, hatudu katak, maioria negosiante sira seidauk kumpri regra sanitária.

Negosiante no kompradór sira mós balun seidauk uza fasilidade, hanesan máskara, fase liman, no laiha distánsia sosiál.

Entretantu Governu mós seidauk prepara fasilidade iha merkadu sira, hanesan bee tanki ba fasé liman, no fa’an fatin mós seidauk tuir liña hodi kumpri distansia sosial.

Jornalista:Novencio Do Carmo Vieira

Editor:Jose Sarito Amaral