Observasaun jornalista INDEPENDENTE, kuaze motorista sira halibur malu iha Ministériu Solidariedade Sosiál no Inkluzaun (MSSI) hodi hala'o prosesu inskrisaun no ezijénsia atu asesu ba subsídiu husi Estadu.

Prezidente Asosiasaun Motorista Munisípiu Dili, Egas Ximenes da Costa hateten, motorista sira sei hakbesik-aan mai iha MSSI atu bele hetan netik osan ruma.

"Ami mai iha ne'e atu simu ami-nia direitu liuliu liga ba subsídiu, maski uitoan ka barak maibé ida ne'e la’ós kestaun mai ami. Importante mak bele ajuda responde ami-nia nesesidade ne'ebé ami enfrenta durante ne'e”, dehan nia, iha MSSI, Kaikoli, horisehik.

Nia dehan, Estadu Emerjénsia durante fulan rua ona, tanba ne'e difikulta tebes sira nu'udar motorista.

Maski nune’e, iha fatin seluk negosiante halerik tanba sei depende hela moris ba motorista sira ne'ebé sei ajuda fasilita sosa na’in sira mai to’o iha merkadu, maibé to'o ohin loron transporte públiku seidauk halo operasaun.

Frederico da Silva, negosiante modo hateten, Governu mós tenke haree mós mai negosiante sira. Motorista sira hetan subsídiu husi Governu maibé oinsá ho negosiante ne'ebé laiha sosa na’in tanba transporte públiku la halai.

"Durante Estadu Emerjénsia ne'e di'ak ida modo rai to'o dodok de'it ema ladún hola. Kuandu mikrolete no taksi halai ne'e ema hola barak. Agora transporte públiku la halai ne'e ema hola mós ladún barak", dehan nia, iha Merkadu Komoro, horisehik.

Nia hatutan, sasán fa'an to'o dodok de'it, dodok soe de'it tanba sasán sira ne'e adia to'o loron ida de'it to'o aban lokraik liu ida ne'e la di'ak ona.

Rendimentu sira nian loron ida bele hetan US$ 15 to'o US$ 20, ne’ebé tuun 100% tanba antes ne’e bele hetan liu US$ 50 iha kada loron.