Tuir Fundador Fundasaun CQR, Isabel da Costa Ferreira, hatete, Fundasaun Ruak simu doasaun nesesidade bázika husi Asosiasaun Xineza Timor-oan hodi tulun labarik no familia kbiit laek sira hodi selebra loron natal no tinan foun.
“Ohin, ita simu doasaun hosi organizasaun sira hanesan asosiasaun komersiál komunidade Xineza Timor-oan ne’ebé lidera husi Kathleen Fon ha Gonçalves sira fó apoia nessidade basika hanesan, foos, supermie, biskueit no mós Asosiasaun Xineza husi Beijing, hanesan xina sira-ne’ebé halo negósiu iha Timor, sira mós iha asosiasaun no sira mós organiza apoia doasaun balun fó ba fundasaun atu selebra natal hamutuk ho ita–nia familia kbiit laek sira,” dehan nia iha Sentru Quesadhip Ruak, Taibesi, kinta horseik (16/12).
Isabel dehan, na’in ba Timor Plaza avó Jape mós fó apoia brinkeiru ho totál hamutuk 100 ba labarik sira, entaun atividade ohin ne’e mai atu simu de’it apoia doasaun husi organizasaun sira no mós individuál hanesan avó Jape.
Husi doasaun ne’e, fundasaun iha programa ho familia kbiit laek no mós familia sira ne’ebé foin forma uma kain no bolu programa konta de bebé no mós joven sira.
“Iha Natal, ita sempre ho atividade sira ne’e, ita oferese ba família sira ne’ebé sai ona hanesan benefisiáriu ba programa fundasaun nian no ita nia planu iha semana ida ne’e no semana oin sei integra ba família sira ho labarik sira,” nia informa
Nia hatete, tuir planu nesesidade bázika ne’e sei lori fahe ba familia kbiit laek hamutuk na’in 100, ne’ebé sai hanesan benefisiáriu ba programa konta de bebé, iha Manufahi iha loron 21.
Ho nune’e, sei fó apoia ba labarik orfonatu sira ne’ebé durante ne’e fundasaun fó apoia inklui idozu sira, tanba iha mós idozu sira ne’ebé sai hanesan benefisiáriu ba programa fundasaun ni’an, ne’ebé tempu naruk akompaña ona sira, hanesan iha familia lima ne’ebé fundasaun akompaña loro-loron sira moris no lori mós ai han ruma ba sira iha tempu natal ida-ne’e.
Enkuantu, tuir planu, Sentru Quesadhip Ruak sei oferese nesesidade bázika hirak ne’e ba familia ne’ebé hela iha munisípiu hanesan iha Manufahi família hamutuk 100, Aileu 61, Liquiça 48 no Dili 100-resin inklui Ataúro.
“Maibé, ita haree apoia sira ne’e la to’o, entaun fundasaun sei apoia tan ho fundasaun nia kbiit hodi kompleta buat ne’ebé sira fó, atu nune’e bele fó apoia ba familia sira-ne’e hotu,” nia dehan.
Entretantu, sasan nesesidade bázika ne’ebé Chinese Merchants Uniaun Association Timor–Leste (CUAT) fó apoia ba Sentru Quesadhip Ruak mak hanesan, foos kilógrama 20 ne’e saka 50, trigu saka 10, masin-midar klógrama 50, supermie dos 50, masin dos rua (2), susu-been dos 10, mina dos 10, boneka 400 no roupa 480,
Asistente Editor: Saturnina da Costa
