Prezidente Sentru Lojistik Nasionál (CLN), Agustinho Junior Trindade dehan, maske nasaun balun hapara ona sira-nia atividade esportasaun no importasaun, maibé iha nasaun tolu, Srilanka, India no Kambodia mak fó ona sira-nia pedidu atu atu hatama foos mai Timor-Leste.

Maibé, nia hatete, CLN sei hein hela alokasaun orsamentu.

Nia dehan, daudauk ne'e sei iha faze diskusaun kona-ba orsamentu refere atu foti husi Gabinete Jestaun Krije ka husi orsamentu duadesimu.

“Maizumenus buat sira ne’e mak atu hatete ita serteza katak esforsu Governu halo par oinsa garante nafatin stok nasionál nune’e povu labele hamlaha iha situasaun Covid-19 ne’e,” dehan Agustinho iha nia knar fatin, Mandarin, Tersa (07/04).

Tuir nia, karik la konsege importa foos iha fulan Abril nia laran, iha inisiu fulan Maiu tinan ne'e foos bele tama ona mai.

"India, Srilanka, Kambodia hato’o sira-nia pedidu mai ona, agora hein Vietnam loke tan, mesmu ke situasaun ida hanesan ne’e mais tenke haree katak lei aprovizionamentu tenke kumpri no hakruk, entaun wainhira dokumantus sira ne’e tama hotu hafoin sei entrega ba parte Komisaun Nasionál Aprovizionamentu (CNA), par sira haree bainhira loos ona husu ba exelensia Primeiru Ministru atu aprova".