"Ami fiar metin katak mate ka moris hotu-hotu hamutuk luta ba rai ida ne'e ho laran haksolok ami kontente ho ida ne'e,mais ami mós fuan moras kanek no dodok, tanba maun sira la lolo liman ba malu,"dehan Naimori, iha diskursu segundu kongresu KHUNTO, sesta horsehik, iha Sentru Konvensaun Dili (CDD).

Tuir Naimori katak, líder sira ne'ebé di’ak mate hotu ona iha tempu libertasaun patria, tanba ne’e Naimori husu ba líder nain hira ne'ebé sei moris tenke rai hela memória diak ba jerasaun foun atu nunee sira hahi nafatin lori mehi sira ne'e ba futuru liberta povu no nasaun ida ne'e.

Iha ambitu situasaun politika atuál,Naimori dedika musika espesiál ida ba líder nasionál titulu 'Mate ka Moris Ita Hamutuk'.

"Kanta ha’u dedika espesiál ba maun Xanana, maun Ramos Horta, maun Mari Alkatiri, maun Lú Olo, maun Taur Matan Ruak, maun Lere Anan Timor no nia alin sira seluk,"dehan nia.

Maske nune'e konselleiru másimu KHUNTO husu nafatin ba joven sira atu kontinu hahi no respeitu nafatin líder nasionál sira hotu atu nune'e aban bainrua sai líderansa sai ezemplar diak tuir mehi líder sira rai hela,tamba tuir nia haree joven sira nia mentalidade morál lakon dadauk ona.