Iha serimónia inaugurasaun, Ministru MTKI, José Lucas da Silva hatete, Timor-Leste hanesan nasaun ne’ebé kiik maibé iha potensiliadade boot ba seitor Turismu, ho nune’e oitavu governu konstituisionál liu husi Ministério tau prioridade ba sítiu turístiku, no promove komunidade sai sentru ba dezenvolvimentu Turismu komunitáriu.
“Ohin tempu ida Istóriku tebes ba fatin turístiku bee Lulik manas ofisialmente ita loke ba públiku, atu esplika uituan kona-ba Sítiu ida ne’e, iha tinan 2019 iha orsamentu tau iha ne’e liu husi SEFOPE, ida ne’e katak sira konstrui hotu tiha liu husi programa empreza rurais, ho nune’e iha tinan 2020 iha fundus kontinuasaun ba sítiu ida ne’e mai husi Ministériu Turismu, Komérsiu no Indústria liu husi Diresaun Nasionál Turismu Komunitáriu ne’ebé tutela iha Diresaun Jeral Turismu, hodi fó ba grupu Labadain Creativu Dezenvolvimentu (LCD) mak jere ita nia sítiu ida ne’e, tanba ne’e ita hotu testamuña alin sira hamosu atrasaun turístika lubuk ida iha ne’e, nia fundus ne’e mai husi Ministeriu Turizmu Komersiu no Industria,”dehan Governante ne’e iha komunikadu ne’ebé Online INDEPENDENTE asesu.
Ministru ne’e relata, ba oin ministériu sei suporta nafatin Grupu Labadain Kreativu Dezenvolvimentu ho orsamentu, nomos ministério sei akompaña ho treinamentu kapasitasaun ba grupu no komunidade iha suku Uaimori hodi bele jere Sítiu ida ne’e la'o ho di'ak.
Iha fatin hanesan, Kordenador Grupu Labadain Kreativu, Julião Gomes Guteres, hatete iha faze dezenvolvimentu, retornu hotu la'os mai husi deit área petroliu minerais, maibé husi parte turizmu mós bele hasa'e ninia rendimentu rasik hodi bele rekopera ekonomia no fó benefisia ba grupu no komunidade iha área rurais
"Ita hotu hatene katak turizmu komunitáriu ne’e hanesan parte ida atu rekoperasaun ekonomia sosiál, ho nune’e ami nia grupu ne’ebé iha inisiativa no ami nia matenek badaen ne’ebé iha atu bele kria atividade ligadu ho turizmu komunitáriu mak hanesan, photoshoot, hodi atrai turista sira mai hasai foto, nune’e mós ami halo aikon kreativu modelu mós hanesan photo shoot, iha mós kadoras vizitantes sira hakarak haris be manas, ami hadi'a fila fali mós fatin suas nian, hodi nune’e vizitantes sira ne’ebé senti kole no isin manas bele suas iha fatin ne’e hodi nune’e isin bele kaman fila fali, atividade ida seluk tan mak fatin hodi da’an manu tolun, ne’e la uza be manas, maibe uza be manas orijin," kordenador relata’.
Atividade ne'ebé Grupu Labadain Kreativu Dezenvolvimentu konstrui iha bee Lulik manas mak hanesan aikon kretivu ida, baraka tradisionál lima, photo shoot 10, fatin da'an manu tolun rua, kadoras ida fatin suas ida no mós ekipamentus barista, atividade hirak ne’e la'o ho susesu tanba hetan kooperasaun ne’ebé diak husi autoridade lokál komunidade no hetan apoiu finanseiru husi Ministériu Turizmu Komésiu no Indústria
Entretantu, Xefe Suku Uaimori, Francelino A. Gomes hanesan mós prezidenti konsultivu ba grupu Labadaen Kreativu senti kontenti tebes tanba sítiu turístiku bee Lulik manas halo ona lansamnetu ba públiku
“ha'u hanoin iha fulan hira liu ba ita halo uluk ona lansamentu ba parte SEFOPE nian konstrusaun ne’ebé remata ona, maibé agora dadaun inaugura ne’e husi parte turizmu nian ne’ebé implementa husi grupu Labadaen kreativu atu nune’e públiku bele utiliza ona, hanesan autoridade lokál, ha'u nia mensajen ba vizitor sira, karik mai vizita sítiu ida ne’e, ita hanesan Timoroan tenki kuidadu ita-nia ambiente, soe lixu iha nia fatin no kuidadu sasan sira ne’ebé grupu konstrui iha ne’e, ida ne’e mós ita kontribui no bele dura nafatin hodi bele uza ba tempu naruk,” haktuir Xefe Suku.
Partisipa iha serimonia inaugurasaun Turismu komunitáriu Wee Lulik manas husi reprezentante Administradór Munisípiu Viqueque, PNTL, autoridade lokál no komunidade iha suku Uaimori.
