Diretór Nasional Promasaum Direitu ba Ema ho Defisiensia, Mateus da Silva informa, kontinua servisu hamutuk ho Ministériu Saúde atu haree kona-ba fatin atendimentu ba Ema ho defisiensia Mental iha Sao de Deus Laklubar, Munisipiu Manatuto.
Nia dehan, iha Sentru São de Deus Laklubar Manatuto iha kama 12, maibé sira iha prosesu konstrusaun atu remata sei aumenta tan kama 24 hamutuk 36 bele akomoda ba ema ho defisiensia psikolojia sosial.
“Husi Ema ho Defisiensia Psikolojia Sosial sira seluk hetan referal doadores munisipiu sira, atu nune'e bele ba halo tratamentu iha, São de Deus,” Dehan Mateus, ba Jornalista INDEPENDENTE, iha knaar fatin Kaikoli,Tersa (21/11).
Nia informa, tuir dadus ne'ebe mak iha, tinan 2023 pasiente hamutuk 27 mak ba halo tratamentu iha Sentru São de Deus Laklubar, agora sira halo tratamentu iha ema na'in 12 mak okupa fatin iha Sentru São de Deus Laklubar.
Nia haktuir, sira ba halo tratamentu fulan-tolu, depois sira rekopera uitoan sei kontaktu enfermeiru moras mental iha munisipiu ne'ebé halo referal ba maluk defisiensia psikolojia sosiál.
Iha MSSI hamutuk relavante sira sei koordena malu hodi re-entrega fali pasiénte ba fámilia, ne'ebé klaru halo tratamentu dala ida ba ema na'in-12 no bainhira halo tratamentu diak ona fila ba moris fatin.
“Sentru Sentru São de Deus Laklubar prosesu kontrusaun hotu iha fulan kotuk, ne'ebé fulan hirak liu sira la pasiente, bainhira konstrusaun remata ona sira simu pasiente hanesan bai-bain,” Nia afirma.
Aliende ne'e Iha Munisipiu Bobonaro madre sira mak servisu hodi halo atendimentu ba ema ho defisiensia psikolojia sosial, iha fulan hirak liu-ba pasiente ida mak toba iha ne'ebá.
“Ha'u seidauk simu informasaun katak to'o agora ne'e iha ema na'in hira halo tratamentu, maibé ida ne'ebe ha'u hare'e defisiensia ida mak halo tratamentu iha Bobonaro,” Nia afirma.
