"Ohin ita halo lansamentu ba planu estratejia ida ne’e hanesan instrumentu ida ne’ebé trasa dalan ba protesaun sosial iha dékada tuir mai, hanesan ema hotu hatene katak, estratéjia nasionál ida ne’e aprova tiha ona iha Konsellu Ministru iha loron 11 Fulan fulan-Novembru tinan 2021 liu ba,"dehan Ministra Solidariedade Sosial no Inkluzaun (MSSI), Armanda Berta do Santos, iha nia diskursu hafoin hala’o lansamentu iha salaun City8 Manleuana, Sesta ne'e (4/2).
Objetivu prinsipal husi lansamentu ne’e, Berta esplika Timor-Leste hakarak halakon kiak no promove dame no garante asesu ba saude, edukasaun no servisu esensial sira seluk tan.
Atu alkansa objetivu sira ne’e, liuhusi asaun habelar apoiu ba grupo Vulneravel liu,  hadia sistema transferensia sosial osan nian, aumenta apoiu nutrisaun, fasilita asesu saude, edukasaun, haforsa prevensaun no resposta ba dezastre sira.
Aliende ne’e, hadi’a no habelar seguransa sosiál ba traballadór sira, dezenvolve sistema seguransa sosiál kontributivu, dezenvolve Institutu Nasionál Seguransa Sosiál (INSS).
"Tanba atu bele Garante no kuidadu ne'ebe adekuadu ba labarik sira, ferik no katuas, ema ho Difisiensia no mos bele proteje populasaun sira hasoru risku sosial no ekonomia no atu garante nivel moris nian ida ne'ebé dignu ba sidadaun Timoroan hotu,"nia dehan.
Nia informa, atu konkretiza vizaun ba protesaun sosial iha Timor-Leste iha tinan 2030, Estadu iha kompromisiu no responsabilidade hodi bele fó protesaun ne'ebé di'ak ba ema hotu.
Aliende ne'e, Vise Ministra Soliedariedade Sosial, Signi Chandrawati Verdial, mak lidera hodi halo konsulta ho parseiru sosial no doador no sosiedade sivil kona-ba prespetiva apoiu atu suporta implementasaun planu estratejia refere ba 2021-2030.
Planu ne’e sei hala’o liuhusi koordenasaun liña ministerial relevante sira hodi bele garante protesaun sosial ba ema hotu.
Enkuantu iha eventu lansamentu ne'e, prezensa husi Primeiru Ministru Taur matan Ruak, membru Governu sira ne’ebé relevante ba planu ne’e, representante Parlamentu Nasional, sosiedade sivil sira, parseiru internasional, no responsavel sistema protesaun sosial iha Timor-Leste
Eventu lansamentu ne'e realiza tanba serbisu hamutuk ho parseiru ho programa ACTION/Portugal, implementa husi Organizasaun Internasional do Trabalho (OlT) no finansia husi Governu Portugal.

Asistente Editor: Saturnina da Costa