Tuir Vise-Ministra MSSI, Signi Verdial hateten, programa ida ne’e ho objetivu atu investe ba dezenvolvimentu kapital humanu, liu-liu ba futuru jerasaun foun Timor-Leste nian, hahú husi inan ninia kanotak to’o labarik ne’e moris.
Governante ne’e dehan, osan ne’ebé benefisiáriu sira simu atu sosa aihan nutritivu ba inan no oan sira. Molok benefisiárius simu nia osan parteira sira konsulta uluk no fó akonsellamentu ba saúde, liu-liu fó informasaun ba aihan nutritivu hafoin benefisiáriu sira bele simu nia osan.
“Iha futuru ekipa sei halo avaliasaun husi implementasaun programa ida ne’e, ne’ebé ekipa sei vizita benefisiáriu sira nia uma hodi hatene mudansas no atetude iha uma ne’e la’o oinsá no buka hatene osan ne’ebé sira simu ne’e sosa duni aihan nutritivu ou la’e, tanba programa ida ne’e ninia intensaun atu asegura saúde ne’ebé di’ak ba inan no labarik sira,” dehan nia iha komunikadu ne’ebé Online INDEPENDENTE sita.
Tanba ne’e, Vise Ministra MSSI, husu ba autoridade lokais sira no parte notariadu atu bele fasilita hodi komunidade sira bele hetan ninia dokumentu kompletu hanesan Billete Identidade no Sertidaun RDTL, nune’e sira bele asesu ba iha programa governu sira, liu-liu ba programa BdM-JF ne’e rasik.
Iha biban ne’e mós Vise-Ministra MSSI fó parabéns ba benefisiáriu sira ne’ebé asesu ona ba pagamentu ida ne’e.
Iha fatin hanesan, Representante Ministra Saúde, atuál Diretóra Jerál Ministériu Saúde, Odete da Silva Viegas hateten, programa ida ne’e bele fó rezultadu positivu bainhira labarik sira bele hetan nutrisaun ne’ebé di’ak no inan isin rua sira bele prodús labarik sira ho nutrisaun ne’ebé di’ak.
Atu asegura implementasaun programa ida ne’e hodi la’o di’ak mak parte saúde iha papél importante tebes katak, benefisiárius sira molok simu nia osan ba dala uluk sei hasoru parteiras no infermeirus atu hetan konsulta hodi sukat sira nia aas no todan, ba inan isin rua sira keta iha defisiénsia ruma durante sira nia gravidez, nune’e sira bele hetan atendimentu ne’ebé apropriadu atu nune’e oan sira ne’ebé moris mai labele iha defisiénsia iha futuru mai.
“Ita nia objetivu finál mak bele hatun risku mál nutrisaun ba labarik hotu iha Timor-Leste no inan isin rua sira bele hetan atendimentu durante fulan 9 iha sentru saúde no parte saúde sira ne’ebé ita oferese”.
Nune’e mós, Benefisiária Carolina do Carmo husi Suku Abat oan, Aldeia Ranac, “hato’o ninia sentimentu orgullu no kontente ba VIII Governu Konstitusionál ne’ebé bele implementa programa BdM-JF ida ne’e, tanba bele ajuda ona hau hodi sosa aihan nutritivu ruma hanesan, modo tahan, manu tolun, na’an no ikan ne’ebé bele fó han hau nia oan”.
Xefe Suku Mane haat, Abilio da Costa hateten, hanesan autoridade lokál apresia tebes ba programa ida ne’e, tanba bele benefisia direta ba komunidade sira, liu-liu ba inan isin rua no labarik sira husi tinan 0-6, hodi hamenus mál nutrisaun iha Timor-Leste.
Tan ne’e, nia husu ba governu atu kontinua nafatin programa ne’e iha futuru, mesmu mandatu VIII Governu Konstitusionál remata ona, maibé ninia programa labele hotu, tanba ne’e husu ba governu foun ne’ebé mak atu mai bele kontinua nafatin.
“Husu mós ba benefisiárius sira atu uza osan ho didi’ak no sente sai nain ba programa ida ne’e, nune’e ita bele redús númeru mál nutrisaun iha Timor-Leste,”dehan Xefe Suku.
Felicity Errington, Primeira Sekretária ba Protesaun Sosiál, Jéneru no Defisiénsia husi DFAT/Governu Australia hateten, “ami Governu Australia husu ba Timor-Leste atu asegura programa ne’e hodi la’o ho di’ak no operasionalmente bele la’o ho regular. Hau espera katak, Governu Australia bele kontinua sai nudar parseiru ne’ebé iha valor ba esforsu ne’e, liu husi programa parseiru dezenvolvimentu humanu (PHD-sigla Inglés) ne’ebé servisu besik liu ba ministériu relevante sira”.
Entretantu, programa BdM-JF ba faze primeiru, hahú implementa ona iha Munisípiu Ainaro, Bobonaro no RAEOA iha tinan 2022 no ba faze daruak ne’e implementa ho simultañamente iha Munisípiu Manatuto, Kovalima, Likisa no Vikeke, no tuir planu sei kontinua ba munisipiu sira seluk.
Objetivu husi programa ne’e mak atu redús pobreza, hadi’ak saúde nutrisaun inklui redús ra’es badak, promove inkluzaun ekonomiku no estimula ekonomia lokál.
Pagamentu faze daruak nian sei fasilita husi kompaña MOSAN/Telemor. Desde lansamentu iha fulan Juñu 2022 to’o 31 Marsu 2023 númeru benefisiáriu ne’ebé mak rejistu no aprovadu ona husi Munisípiu 6 no RAEOA hamutuk nain 35.130 ba subsídiu inan isin rua, labarik no labarik ho defisiénsia.
BdM-JF maka programa trasferénsia osan husi sistema asisténsia sosiál ne’ebé kompostu ba subsídiu $15,00 kada fulan ba inan isin rua sira durante períodu kous no $.20,00 kada fulan ba labarik tinan 0-3 no sei kontinua to’o tinan neen (6) ho suplementu adisionál $.10,00 kada fulan bainhira labarik ho moras krónika no/ka defisiénsia.
Aleinde subsídiu osan kada fulan, programa BdM-JF mós fornese akonsellamentu kona-ba saúde husi pesoál sira inklui ba kuidadu saúde durante períodu isin rua, períodu primeira infánsia inklui imunizasaun, nesesidade hahan nutritivu ba família no pratika ijéniku no sanitasaun.
