Instituisaun Solidariedade Sosial 26 mak hanesan, Uma Mahon sira, instituisaun ne'ebé haree ba área Defisiénsia iha neen (6) no Orfonatu rua (2) no hela instituisaun tolu (3) mak sei iha hela faze diskusaun ba sira-nia proposta.
Diretór Jeral MSSI, Rui Manuel Expostu hatete, MSSI asina akordu ho ISS tanba, bazea ba dekretu lei numeru 25/2017 kona ba rejimentu MSSI nian.
Nune'e hahú tinan ne'e MSSI aplika dekretu lei numeru 25/2017 ba Instituisaun Solidaridade Sosial sira ne'ebé hakarak halo rekerementu ba iha estatutu hodi fó apoiu ba maluk sira ne'ebé presiza tulun.
“Tuir loloos rejime no dekretu lei ne’e iha tinan 2020 ita realiza ona, maibé ho situation Covid-19 la konsege, nune’e MSSI halo preparasaun ba instrument hotu, atu oinsa Instituisaun Solidariedade Sosial sira hetan atribuisaun utilidade sosial nian,”dehan nia iha salaun MSSI Kaikoli, tersa horseik (17/08).
Nia hatutan, MSSI loke prosesu rekerementu ba instituisaun hahú iha fulan-Novembru tinan 2020 to'o mai fulan-Jullu tinan 2021 no institutu 30 mak hatama rekerementu. Husi institutu 30 ne'e, 29 mak rekendidu no agora dau-daun públika ona iha Jornal Repúblika ne’ebé sai hanesan utilidade sosial.
Tuir nia, iha instituisaun ida mak indeferidu tanba la prienxe rekezitu tuir dekretu lei numeru 25/2017 nian.
Tanba ne’e, instituisaun 29 ne’ebé hetan ona estatutu utilidade sosial sira hatam mós iha proposta orsamentu ba tinan 2021 nian.
Nia espilika, husi proposta ne'e MSSI kria nia ekipa evaluasaun ida hodi involve Provedória Direitu Umanu no Justisa (PDHJ), Gabinete Primeiru Ministru, Sosiedade Sivíl no Komisaun Nasional Direitu Labarik (KNDL), hanesan observadór ba prosesu evaluasaun proposta instituisaun refere.
Entretantu, orsamentu ne’ebé aprova ba instituisaun 26 hamutuk dolar amerikanu tokon $1.2 ($1.213.755.88).
Iha fatin hanesan Diretór Ezekutivu Asosiasaun Halibur Defesiensia Matan Timor-Leste (AHDMTL), Gaspar Afonso hatete, tinan ne’e sira hetan osan hamutuk dolar amerikanu rihun $63,296.
Tuir nia, osan refere la sufisiente ba sira nia programa advokasi, edukasaun, saúde no apoia ba kustu operasional.
“Osan ida ne'e la sufisiente ba ami nia programa, tanba programa barak mak elimina no ita asina Akordu ne'e iha ona fulan-Agostu maibé loloos ne'e iha fulan marsu, nune'e ita bele hala'o atividade sira, maibé mós fundus ne'ebé atu transfere ne'e sei han tempu tan,”dehan Gaspar.
Tanba ne’e, nia rekomenda ba Governu atu hare situasaun ne’e, atu iha futuru oin mai bele haree hodi aumenta fundus ba asistensia Instituisaun Solidariedade Sosial nia.
Asistente Editor: Saturnina da Costa
