“Husi númeru ne’e, maioria kazu husi kapital Dili rejista hamutuk 191, hafoin munisipiu Manatutu iha kazu 17, Ermera iha kazu ualu (8) inklui mate na’in haat (4), Kovalima iha kazu hitu (7), Vikeke iha kazu tolu (3), no Likisa ho Bobonaro iha kazu ida (1),”dehan iha komunikadu neebé Online INDEPENDENTE asesu, segunda ne’e (10/01).
Ho nune’e, iha munisipiu hitu mak daduk ne’e rejista ona kazu dengue, enkuantu maioria labarik ho idade 1-4 no 5-14.
“”Idade mais afetadu mak, idade menus husi 14 anos mai kraik ho grupo idade 5-14 iha pursentu 46,5 no idade 1-4 iha pursentu 40,4,”haktuir komunikadu refere.
Tanba ne’e, Ministeriu Saúde apela ba populasaun sira iha Dili laran no mós iha Munisipiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka sente laran sa’e, liman-ain no sikun moras hodi bele hetan atendimentu husi profisionál saúde sira.
Apela mós ba populasaun iha Dili laran no mós iha Munisipiu sira seluk, liuliu husu ba Autoridade Munisipál no Autoridades lokál atu bele orienta komunidade halo limpeza jerál iha suku no bairru, fase tanke, bidon ka balde tau bee semana ida dala ida.
Aleinde, hamoos sasan ka limpeza hanesan roda aat, bazu ai-funan atu susuk labele tau tolun, haloot ropa ho di’ak iha ita nia uma laran, uza ropa ne’ebé liman naruk, karik toba iha tempu loron, uza aimoruk hanesan repelente ka autan, uza muskitéru karik toba iha tempu loron no soe lixu iha nia fatin.
