Tanba ne’e, sira husu ba Prezidente Repúblika José Ramos Horta atu veta proposta projetu lei numeru 5/2004, 5 de maio, ne’ebé estabelese estatutu deputadu sira hodi atribui subsidiu ba saude no transporte, ba deputadu sira iha Parlamentu Nasional.

Portavos Sentru ba Haburas Movimentu Direitus umanus, Imaculada Gouveia Leite, hatete, iha artigu numeru 67 konsituisaun Republika Demokratika Timor-Leste (K-RDTL) ne'ebe preve Parlamentau Nasional nu'udar orgaun soberania daruk no papel importante hodi produz legisllasaun no fiskalizasaun.

Maibe sira triste, haree deputadu iha parlamentu nasional durante ne’e produz lejislasaun la fó benifisiu ba povu maibé benifisiu deit ba sira nia aan no grupo no lahatudu nia kualidade hanesan reprezentante povu.

“Desizaun ida ne’e ami husi Sentru ba Haburas Direitus Umanus lamentavel tebes tanba subsidiu ne’e laiha benifisiu ba interese publiku, maibé benifisiu deit ba deputadu na’in 65 iha Parlamentu Nasional,” dehan nia, liu husi konferensia imprensa, iha Kampaun HAK-Farol, Dili, tersa ne’e (28/11).

Sentru Haburas Movimentu Direitus Umanus mós husu, atu osan subsidiu ba deputadu sira iha parlamentu nasional ne’e bele aloka ba iha setor importante sira hanesan, edukasaun, saude, bee moo no agrikultor atu hodi  garante sustentabilidade iha nasaun ne’e.

“Ami prefere orsamentu subsidiu ne’e bele aloka ba iha setor importante sira hanesan edukasaun, saúde, bee moos no agrikultor hodi halo melloramentu atu nune’e bele garante ba sustentabilidade,” tenik Portavóz.

Aleinde, Sentru ba Haburas Direitus Umanus husu ba Parlamentu Nasional atu prioridade ba povu ne’ebé moris vulneravel tebes iha área rual no labele uza povu nia sofrementu sira hodi aprova subsidiu oioin atu fó deit privelejiu ba sira nian aan.

Iha Fatin hanesan, Membru Sentru ba Haburas Movimentu Direitos Umanus Liborio Costa hatete, desizaun ne’ebé deputadu sira foti, hanesan traisaun no diskriminativu boot ida ba povu.

“Ami lamentavel tebes, ida ne'e hanesa diskrimina boot no halo traisaun ba povu ida ne’e,”dehan nia.

Entretantu, rekorda katak, deputadu sira iha Parlamentu nasional aprova ona projeitu Lei N°4/VI (10 alterasaun ) ba lei N°5/2004,5 maiu, ne'ebe estabelese estatutu deputadu sira, hodi atribui subsidiu ba saude no subsidiu tranporte  ba deputadu sira iha Parlamentu nasional kada fulan ho votu a-favor  50, kontra 1 no abstensaun 6.

Enkuantu, subsidiu ne’ebé aloka ba transporte ho montante dolar amerikanu $1.600 no subsidiu saúde ho montante dolar amerikanu $600.00, kada fulan.