Geraldo da Souza, motórista mikrolet 10 hateten, baihira governu hapara movimentasaun transporte publiku iha kapital Díli, nia sente triste tebes tanba difikulta ona sira-nia vida nu'udar motórista hodi kontinua hatutan moris.

"Ami sente triste tanba ami-nia moris mak ne'e ona. See taka to'o fulan tolu ne'e ami arraska ona. Ami iha ne'e kost tan, uma nain ezije atu selu ne'e ami osan iha ne'ebe be atu selu" dehan nia, iha Tasi tolu, horisehik.

Tanba ne'e, sira hakarak halai para bele buka netik osan hodi ba han-hemu no selu kost. Nia dehan, bainhira rona informasaun husi media dehan mikrolet sira bele halai ne’e mak halai, maibe labele tula liu na’in ualu (8).

Ne’e duni, durante sira halai kuandu ema sa’e nain ualu ona ne’e sira la para ona, ba liu deit to'o ema balu tun ona maka foin bele tula fali, maibe susar tebes atu hetan pasajeiru to'o nain ualu.

"Bainhira tula hanesan ne'e ami sente triste tebes tanba ense mina nian mos la to'o, estor nian mos la to'o, loron ida halai ami hetan la to'o $25, ne'ebe ami enxe mina $10 hatama $10 nia restu mak ami uza hola netik modo lori ba uma, loron ida ami bele lori deit $2 ba uma ida ne'e mak ami uza ba nesesidade loron ida nian la to'o mas pasensia", dehan nia.

Iha sorin seluk, Costantino Barbosa nu'udar taxista hateten, durante ne'e halai ba mai dala ruma to'o $5 mos la hetan, kuandu halai to'o mina laiha pasensia para iha uma deit.

"Ami sente susar tebes ami kuandu halai mak bele hetan netik dolar ida rua hodi atende ami nia uma laran, kuandu penumpan laiha hanesan ne'e ami araska los" dehan nia.

Nia hatutan, boot sira dala ruma dehan buat hotu diak mas ki'ik sira ne'e araska tebes. Sira dala ruma iha uma deit mos fulan fulan osan tama mas kareta tenke halai mak ami bele hetan osan. Kuandu hetan to'o $20 ka $30 sei ense mina no stor tan nia restu mak foin uxa ba presija uma laran nian.