Tuir Ministru Samuel, durante ne’e eletrisidade mate-lakan tanba prosesu konstrusaun sira ne’ebé la’o nune’e tenke hamate.
“Hadia estrada, muda buat sira ne'e fiu la soke la presiza hamate. Tanba fiu ne'e kaer ba soké fali ema, entaun tenke hamate tiha lai, muda tiha, la'o ba, depois mak hadia estrada,” dehan Ministru Samuel hafoin hasoru-malu ho Prezidente Repúblika, José Ramos Horta, iha Palasiu Prezidensial Repúblika, Bairo-Pite, Sesta 13/02).
Maibé, Ministru ne’e promete, bainhira prosesu kontrusaun ba infraestrutura underground finaliza ona no fiu sira hakoi hotu ona ba rai okos, kondisaun eletrisidade sei estavel.
"Iha Komoro finaliza ona, tuir teknika dehan Marsu, Abril funsióna.Karik laiha impedimentu ruma bele finaliza ona. Ha'u bele garante katak, ahi mate ne'e bainhira ita mak hakarak hamate, se ita la hamate ahi sei la mate, parte husi iha ne'e ba to'o Bekora sei la mate," dehan Ministru Samuel.
Tuir planu, Ministru hatutan, fiu eletrisidade husi Akadiruhun to'o Ministériu Obras Públiku nia oin, Katedral ba Balide to'o Kuluhun, husi Fatuhada to Rotunda Nicolau Lobato sei hatun hotu ba iha rai okos.
"Se hirak ne'e ita bele finaliza hotu, ita bele garantia Dili laran ne'e ita dehan la 100% mais 99% ahi sei la mate,” dehan nia.
Ministru ne’e kompriende mós ho preokupasaun públku kona-ba ahi ne’ebé sempre mate-lakan.
“Ahi mate ne'e la'ós problema polítika, ne'e problema tékniku, ita tenke buka ninian problema iha ne'ebé nune'e ita rezolve," nia hatete.
Ho nune’e, daudauk ne’e governu hahú rezolve tuir faze. Ba dahuluk hahú ona husi ponte BJ Habibie to'o Bekora.
“Tarde uitoan tanba ami presiza muda uma, buat sira ne'e hotu, balun konkorda, balun la konkorda, ne'e mak haan tempu uitoan, mais emprinsipiu hotu-hotu konkorda, kontente.”
Ministru lova mós komunidade sira ne’ebé harii uma iha dalan ninin ne’ebé ho fuan boot koopera di'ak. Ho sira-nia kontribuisaun ne’e Timor-Leste sei lao ba oin.
Molok ne’e, Prezidente Parlamentu Nasionál, Maria Fernanda Lay, preokupa ho eletrisidade ne’ebé sempre mate-lakan tanba bele estraga sasán eletróniku iha Parlamentu Nasionál.
