Sekretáriu Estadu Formasaun Profesional no Empregu, Rogério Araújo Mendonça, Governu Timor-Leste, sempre realiza Serimónia ida ne'e hodi governu bele fó mensajem ba Traballadór sira. Nia objetivu mak oinsa bele fó mensagem ba traballadór sira la’o tuir regulamentu no prosedimentu.

"Governu sempre realiza serimónia despedida ba ita-nia traballadór sira, bainhira husik ita-nia rai ba servisu iha nasaun seluk, nia objetivu mak Governu liuhosi SEFOPE hato'o mensajen ba ita-nia traballadór sira, atu sira ba servisu iha ema nia rai, tuir duni regulamentu no prosedimentu nasaun rua ne'ebe iha, tuir akordu Timor-Leste entre Governu Korea,” dehan nia, iha Salaun Timor Lodge, kuarta (28/02/24).

Sekretáriu Estadu fundamenta liu tan, kultura husi nasaun ida-idak la hanesan, tanbá ne'e nia husu ba traballadór kuandu halo sala iha servisu, nafatin husu deskulpa ho oin hamnasa.

"Ita hotu hatene ona katak kultura nasaun hotu-hotu la hanesan, tanba ne'e husu ba Traballadór ba servisu tuir regulamentu Korea nia, bainhira imi hanesan Traballadór kuandu halo sala, liafuan deskulpa laos buat todan ida, husu deskulpa ho oin hamansa." Tenik Sekretáriu Estadu.

Sekretáriu Estadu mós husu ba traballadór sira ne'ebé foun ka foin mak atu ba, tenke halo adaptasaun ho ema nia ambiente foun iha Korea ne'ebá, no hatudu disiplina ho maturidade iha servisu fatin, hodi nune'e bainhira fila mai Timor-Leste, bele iha tan oportunidade husi Empregadór hodi ba servisu iha ne'ebá.

Nia mós husu atu Traballadór sira bainhira sai husi Timor-Leste ba iha Korea, atributu organizasaun rai hela ho Família, nune'e fila mak bele uza fila-fali iha rai Laran.

Entretantu, husi numeru traballadór ema na’in 95, iha traballadór na’in 3 mak re-entry, Traballadór ema na'in 92 ne'e foun ka New, no sira na'in hira ne'e ba iha area peskas no fabrika.