Primeiru Ministru (PM) Taur Matan Ruak hakarak aselera lalais prosesu akizasaun, nune’e, governu bele transfere osan ba kompañia rua.

“Fulan ida ne’e ita tenke selu, tanba prosesu la’o maka’as loos. Ha’u espera katak, antes loron 18 fulan ne’e, ita selu ona”, dehan Taur hafoin enkontru semanál ho Prezidente Repúblika iha Palasiu Prezidensiál Bairru-Pité, Kinta (7/3).

Kona-bá planu ne’e, sosiedade sivíl ezije governu atu transparente, liu-liu tenke publika relatóriu transferénsia orsamentu, nune’e, públiku bele akompaña no bele hatene lala’ok kontratu no sistema pagamentu entre estadu Timor Leste ho kompañia esploradór greater sunrise.

Diretór ezekutivu Luta Hamutuk, José Alves da Costa hateten, tuir akordu ne’ebé estadu Timor Leste halo ho ConochoPhilips ho Shell katak, iha Marsu tinan ne’e Governu hahú halo pagamentu ho montante tokon $650.

“Tebes duni ka lae bainhira Marsu hanesan deadline ba ita atu selu asaun, bainhira Governu la selu mak multa ka iha kometimentu seluk, karik fa'an fali ba kompañia seluk ou oinsá,” dehan José iha Faról, Kinta (7/3).

Hanesan sosiedade sivíl, konsidera ida ne’e nesesáriu tebes ba governu tenke publika dokumentu sira, atu bele konvense públiku, ne’ebé durante ne’e preokupa asuntu ne’e.

José Alves moos kestiona kona-bá, bainhira iha fulan Marsu nia laran mak governu la konsege transfere osan, ho montante tokon $650, penalidade saida mak sei akontese.

Alende ne’e, risku no alternativa saida mak estadu ne’e tenke foti, hodi labele kona sansaun.

Entretantu, osan atu sosa asaun ConocoPhilips no Shell Energy, governu prevee ona tokon $650, hafoin Lei Atividade Petrolífera (LAP) hetan promulgasaun husi Prezidente Repúblika.

Maski nune’e, governu seidauk bele foti osan husi fundu petrolíferu, tanba Tribunál seidauk anunsia rezultadu fiskaliza saun abstrata ba LAP ne’ebé antes ne’e bankada FRETILIN no PD husu.