DILI: Governu liu husi Ministériu Ensinu Superior Siensia no Kultura (MESSK), sei fasilita ema ho defisiénsia sira iha tranzisaun públiku iha ensinu prossesu aprendijazen nian.
Ministru Ensinu Superior Siensia no Kultura (MESSK), Longuinhos dos Santos hateten, objetivu iha tranzisaun ne’e, atu bele fasilita ema ho defisiensia sira asesu iha ensinu superiór.
“Ita sei fasilita ita nia ema ho defisiénsia sira atu asesu ba iha ensinu superior . Tanba ne’e, ita sei koordena ekipa tekniku sira hodi tun bá identifika ita nia maluk defisiensia sira ne’ebé atu tama iha universidade,” dehan nia iha palasiu Governu , kuarta (26/01).
Molok ne’e, Diretór Nasionál Protesaun Direitu ba Ema ho Difisiensia, Mateus da Silva informa ona katak, Governu liu husi Ministeriu Solidariedade Sosiál Inkluzaun (MSSI) asina akordu ho Ministeriu Ensinu Superior Siénsia no Kultura (MESSK) hodi fasilita labarik difisiente sira, ne'ebé remata iha nivel sekundariu hodi kontinua iha universidade.
Agora nia prosesu la'o hela, husi MESSK mak prepara materia atu fo ezame ba labarik sira, depois sira pasa no asesu ba iha bolsu estudu ne'ebé husi MESSK prepara ona.
Nia hatutan, ba oin MSSI sei servisu hamutuk ho MEJD hare'e ba edukasaun inkluzivu, labarik difisiensia bele asesu ba iha eskola públiku sira, inklui kooperasaun MSSI no SEKOMS hodi estabelese rádiu Komunidade ida ba ema ho difisiensia sira.
Planu ne'e husi Ministériu ida-idak hodi tau iha planu orsamentu ba tinan fiskal, sira bele halo prioridade ba programa ne'ebé atu garantia inklusaun ba ema ho difisiensia.
Asistente Editor: Saturnina da Costa
