Tuir dadus husi Komando Jeral Polisia Nasionál Timor-Leste (PNTL), husi total membru PSHT liu 300 ne’ebé tama illegal iha TL, na’in 100 mak kumpre ona loron 14 iha kuarentena obrigatoriu.

Komandante Jeral PNTL, Komisariu Faustino da Costa hatete, ekipa investigasaun PNTL nasional no munisipiu rejistu ema na’in 100 mak Ministériu Saúde liberta ona husi kuarentena obrigatoriu.

Nia hatete, prosesu identifikasaun ba ema sira ne’e hotu ona no sei hein desizaun husi Ministériu Públiku ba prosesu tuir mai.

“Ita halo hela indentifikasaun ema na’in 100 ne’ebé Ministériu Saúde liberta ona atu halo prosesu, tanba ne’e hein Ministériu Públiku atu foti desizaun,” dehan Faustino ba jornalista sira hafoin serimonia inaugurasaun uma guarda PNTL iha Kuartel Jeral PNTL, Kaikoli, Tersa (29/09).

Nia hatutan, daudauk ne’e prosesu tomak iha MP nia liman, tanba MP mai sai nu’udar nain ba ba iha prosesu.

Iha fatin hanesan, Vise Ministru Interior Antonio Armindo hatete, PNTL no Ministériu Interiór (MI) kontinua halo investigasaun ba sidadaun sira ne’ebé tama-sai illegal iha fronteira hodi prosesa ba MP.

Nia dehan, ba sidadaun sira ne’ebé tama illegal no PNTL kaptura ona hodi hatama ba kuarentena obrigatoriu, bainhira sira kompleta ona loron 14 iha kuarentina, sei kontinua halo proseu ba iha MP atu bele foti desizaun ruma.

"Sidadaun sira ne'ebé tama ilegál ne'e liu 300 resin, ne'ebé agora lorloron ita kontinua kaer, balun sei tama sai nafatin, ne'ebé númeru loloos ne'e ita labele ko'alia katak hanesan ne'e, maibé agora ne'e kontinua akontese, ne'ebé to'o semana oin hanesan ne'e bele to'o 400 hanesan ne'e," dehan nia.