Tuir dadus eskola husi nivel primária to’o nivel esnsino Sekundaria iha Munisipiu Dili hamutuk 197. Husi total ne’e, eskola 99 mak preparadu no sei reativa hirkás iha loron 19 fulan-Jullu 2021.

“Ita nia dadus husi Ministériu total eskola hamutuk 197 maibé 99 mak preparadu ona hodi reativa hikás aula”dehan Vise Ministru ne’e ba jornalista sira iha Palasiu Governu, hafoin partisipa iha reuniaun Konsellu Ministru, Kuarta ohin,(14/07).

Governante ne’e afirma profesór sira iha Dili hamutuk 3.153, profesór ne’ebé simu ona vasina hamutuk 1.498. Haree husi dadus vasina ne’e mak eskola 99 mak prepara ona atu reativa aprendizazen.

Tanba ne’e, husu ba eskola sira ne’ebé preparadu atu reativa aula tenki kumpri nafatin protokolu saude, inklui tenki vasina, tau maskra no uza hand sanitizer.

Entretantu, molok ne’e Ministru Edukasaun Juventude Desportu, Armindo Maia deklara katak atividade eskola bele reativa depende ba númeru kuantidade professór sira tuir vasina.

Regra ne’e, professór sira hotu tenki kumpri hodi prevene surtu Covid-19 iha prosesu aprendizajen.