Liuhusi despaisu No. 084/MI/VII/2021, ne’ebé públika iha Jornal Republika iha loron 9 jullu 2021, Guvernu desidi taka provizóriu postu fronteira terestre hodi evita risku propagasaun tanba konsidera Covid-19 variante Delta iha potensia fó perigu tebes ba ema nia saúde no vida umana ba komunidade tomak iha teritoriu nasionál.
“Despaisu ne’e asina hosi Ministru Interior atual Primeiru-Ministru, Taur Matan Ruak, hodi deside taka provizória postu integradu fronteira terrestre hahú iha loron sabadu 10 jullu to’o loron sabadu 24 jullu 2021,”tuir karta komunikadu husi Gabimete Primeiru Ministru no Ministru Interior, kuarta ohin.
Maski nune’e, tuir karta ne'e hateten postu integradu fronteira terestre nafatin funsiona iha loron segunda feira no kuarta feira entre tuku 9 dader to’o tuku 1 meiudia ba deit atividade merkadoria hanesan nesesidade báziku kontinua tama no halo tranzasaun iha área zona livre internasionál TL-RI.
Enkuantu ba sirkulasaun internasional so bele autoriza tama ho razaun fundamental ba intrese publiku no apoiu umanitaria nian.
