Programa HANDS II ne’e selebra atu kontinua dezenvolve edukasaun iha eskola pre-eskolar iha teritoriu nasional hahú iha tinan 2021 to’o 2025.

Programa asina HANDS II nian ba edukasaun pre-eskolar ne'e atu dezenvolve labarik sira nia kapasidade atu bele halimar, aprende no deskobre susesu, programa ne'e kontinuasaun husi HANDS primeiru ne'ebe hala'o ona iha tinan 2015 no remata iha 2020.

Ministeriu Edukasaun Juventude no Desportu (MEJD), Armindo Maia hatete katak, ema barak hanoin edukasaun pre-eskolar ne'e la importante, maibe ita hare didiak edukasaun pre-eskolar ne'e mak sai fundasaun ba edukasaun hotu hotu iha mundo.

Nia dehan, desde uluk kedan hahu husi preimeira governu bainhira governu nova zelandia hakarak  hadia edukasaun pre-eskolar iha Timor-leste, MEJD prontu apoiu programa ne'e hodi bele dezenvolve labarik sira ba futuru aban bainrua nian.

“Ita hotu hatene edukasaun pre-eskolar ne'e sai fundasaun ba prosesu edukasaun sira seluk, ezemplo, ita kuandu halo uma ida mak fundasaun la forte ne'e perigu oituan, tanba ne'e ita kosiente katak  pre-eskolar ne'e halo ona buat barak maibé iha buat barak ita sei presiza hadia no hatutan,”dehan nia iha sala VIP-MEJD, Vila-Verde, kinta ohin (08/07).

Nia hatutan, bainhira vizita pre-eskolar sira iha area rurais, labarik barak mak hasoru dezafiu no kondisaun ne’ebé lapermite, tanba sira tenki lao-ain kilometru 5 husi uma ba eskola.

Tuir nia, iha tinan 2015 to’o agora pre-eskolar iha teritoriu laran tomak hamutuk 500, ne’ebé hahú ona programa HANDS faze dahuluk iha 200.

Tanba ne’e, presiza rekruta tan professor, no halo jestaun ba sistema, fatin halimar no aprende ba programa HANDS faze daruak nian ne’ebé presiza hare mós ba orsamentu edukasaun nian.

Nune’e, programa HANDS pre-eskolar ne'e programa ida ne'ebé importante tebes no presiza asegura edukasaun ba labarik sira ho pursentu 50 (50%), atu nu'une bele sufisiente bainhira tama iha ensinu baziku iha ona fundasaun ne'ebé forte.

Aliened, presiza fó mós formasaun espesial  ba profesores pre-eskolar sira atu haforsa sira nia kapasidade.

Entretantu, Embaixadór Nova Zelandia iha Timor-Leste, Philip Hewitt hatete, programa HANDS hanesan investimentu bo’ot Governu Nova Zelandia nian no mós hanesan privilejiu bo’ot ida atu hasa’e kapasidade no abilidade Labarik sira nian iha edukasaun pre-eskolar.

“Ami senti privilejiu bo’ot, tanba bele kontinua programa HANDS II ne’e hodi hasa’e kapasidade no abilidade estudante pre-eskolar sira iha Timor-Leste, no ha’u hein ita bele servisu hamutuk hodi hadia kualidade edukasaun,”dehan Phillip.

Tanba ne’e, nia hakarak atu tau atensaun ba programa HANDS II, maibé importante ema hotu tenki identifika planu ho diak hodi bele ezekuta.

Asistente Editor: Saturnina da Costa