Ministru Defeza, Donaciano do Rosário da Costa Gomes hateten, VPM no MD Austrália mai vizita Timor-Leste iha ambitu komemorasaun independensia 20 de Maiu no aproveita vizita Ministériu Defeza, tanba iha relasaun amizade ne'ebé forte liu no iha koperasaun ba área barabarak inkluzivamente iha área defeza.
"Momentu ne'e mós ita diskute forma oinsá atu bele hametin di'ak liután ita-nia relasaun iha ámbitu kooperasaun no ami mós konkorda ona hodi asina akordu bilaterál ida entre parte rua, depois sei dezenvolve akordu ne'e iha futuru para hametin liután formatu sira seluk ne'ebé mak besik liután rai rua ne'e", dehan nia, iha Kuartel Jeneral, Fatuhada, horisehik.
Nia dehan, husi asina akordu ne'e parte rua nafatin kontinua servisu hamutuk ba oin, para bele defende interese no hakarak ida ne'ebé mak hamutuk ba rai rua ne'e ninia.
Iha fatin hanesan, Vise Primeiru Ministru no Ministru Defeza Austrália, Richard Marles, sente honradu tanba bele hasoru malu ho Ministériu Defeza TL hodi diskuti no fó hanoin ba malu liga ho interese rai rua ne'e ninia liuliu iha área defeza.
Nia esplika, tanba nasaun rua ne'e iha domin boot ba malu, no mós nasaun vizinu nune'e merese atu fahe interese ba malu.
"Ita-nia diskusaun ohin ne'e marka pozitivu tebes, depois ita haree asuntu seluk tan liuliu kona-ba akordu defeza nia, ne'ebé mak antes ne'e mós ita hala'o hotu ona. Ida-ne'e Pasu ne'ebé pozitivu tebes ne'ebé mak ita sei esforsu hodi realiza iha mandatu sira-ne'e. Liuhusi asina akordu sira-ne'e ami optimista tebes atu realiza servisu sira liga ba área defeza nia iha parte rua,” Nia hakotu.
