Ministru Defeza, Donaciano do Rosário da Costa Gomes “Pedro Klamar Fuik” hatete, hakarak dezenvolve FALINTIL no F-FDTL ba iha futuru atu haree mós ba iha situasaun atuál kona-ba funu no mudansa klimátika ne’ebé provoka situsaun ne’ebé la di’ak ba nasaun.

Minístru dehan, konseitu atu implementa asisténsia umanitária ne’e, tanba mundu enfrenta hela situasaun mudansa klimátika globál, tanba udan halo rai-monu, bee-sa’e, militár sira bele apoiu bá populasaun, atu konstrui pás.

“Iha área rua ne’ebé ha’u hakarak atu ko’alia prespetiva ne’ebé dezenvolve ba iha futuru ida mak haree liu ba iha situasaun atuál ne’ebé ita hotu hatene katak funu iha fatin-fatin iha mós mudansa klimátika, bele provoka buat balun ne’ebé mak ladiak ba nasaun,” Ministru Defeza iha Palásiu Governu, Tersa (25/06).

Kona-ba dezenvolvimentu forsas armadas iha área asisténsia saúde, haree bá realidade atuál perante mudansa klimátika sempre provoka moras oioin no líder topu instituisaun F-FDTL nian iha ona hanoin atu involve forsas armadas nian hodi bele dezenvolve área espesífiku ida kona-bá asisténsia saúde, atu bele kontribui mós bá sosiedade partikularmente bá iha família militár no populasaun en-jerál.

Tan ne’e mak bá oin, instituisaun tenke haree oinsá prepara rekursu umanu ne’ebé treinadu no mós iha formasaun adekuadu hodi bele responde no bele ezekuta prespetiva rua ne’e iha futuru.

“Aprezenta tiha prespetiva rua ne’e bá Primeiru Ministru, hanesan orientasaun bá atividade umanitáriu no atividade bá asisténsia saúde, ami tenke haree depois lori ita-nia forsa armada sira atu bele pró-ativu liu bá ita-nia populasaun iha ita-nia rain ho ita-nia rejiaun ne’e,” katak Governante ne’e.

Kona-ba umanitária nian, nia dehan, bazeia bá orientasaun pás nian, tanba ohin loron funu mosu iha fatin hotu-hotu iha sikun sira mundu nian, no atividade rua ne’e hola parte iha konstrusaun pás iha Timor-Leste no mundu.