Pasiente Covid-19 ho inisial FG , idade 44, hakotu iis ohin dader, oras tuku 7 liu minutu 10, iha fatin izolamentu Lahane Dili, no mate isin tula kedas ho karreta funerario ne’ebé oferese husi MSSI.

Matebian husi Postu Administrativu Laga, Munisipiu Baucau, atualidade hela fatin iha Bidau Masaur, Dili. Nia laen kaben naran Domingos da Costa no oan mane na’in rua.

Tuir observasaun Online Independente nota katak, iha prosesu evakuasaun mate isin ne’e akompaña husi laen kaben ho nia oan mane kiik ne’ebé hetan mos positivu Covid-19 iha kareta ambulansia ekipa saude nian.

Mate isin ne’e akompaña mós ho familia balun, parte Polisia Nasional Timor leste no Polisia Militar sira.

Molok haloot mate isin, akompaña ho sermonia misa katoliku husi Amo Angelo Salsiña ho distansia entre fatin seremonia misa ho rate kuaze metru 100.

Ekipa ne’eebé hakoi mate isin humutuk na’in 8, no medida rai kuak hakoi mate ho naruk metru 2 ho balun.

Roberto Jose Barbosa hanesan maun boot husi matebian nia laen hatete, iha tinan 2017 matebian hetan uluk moras tensaun to’o defikulta nia hetan struk. Husi moras nne’e, nia halo tratamentu no rekopera fali nia saúde.

"Foin dadauk akontese tan ne’e mak grave liu kedan, no doutor sira haruka atu fase ran  hafoin kona tan fali Covid-19,"dehan nia iha fatin Semitériu Covid-19, Metinaro (06/04).

Molok ne’e, Kordenador Pilar VII ba Prevensaun surtu Covid-19, Nilton do Carmo hatete, pasiente ne’e kauza mós husi moras rins (gagal ginzal kronis), tanba ne’e halo nia iis kotu..

"Ohin ita rezista kazu positivu ida ne’ebé mate tan Covid ho tipu kruseila ka kronis".

Tuir dadus Covid-19, segunda horsehik (5/4), ne’ebé Sentru Intregradu Jestaun Krize (SIJK) relata katak dadus ba loron rua nia laran (4,5/4) iha kazu foun hamutuk 52, kazu rekuperadu na’in 25 no kazu ativu ohin loron baixa iha sala izolamentu hamutuk nain 472.

Jornalista: Saturnina da Costa

Editor: Jose Sarito Amaral