Deputadu husi bankada PD ne’e dehan, maske Tribunal Rekursu (TR) deside hodi absolve nia husi krime ne’ebé Tribunal Dili aplika ba nia, maibé nia sei la husu fila fali ninia naran di’ak.
“Primeiro atu dehan katak ha’u iha situasaun defisil ne’e depois ha’u hetan prejuizu, prejuizu la’os problema materia de’it, maibé hanesan ha’u-nia naran (di’ak),” dehan Eis Ministru Komersiu, Industria no Ambiente ne’e, iha Parlamentu Nasionál, Tersa (16/04).
Kalohan dehan, Konstituisaun hatete ema hotu-hotu iha direitu ba naran di’ak bainhira desizaun Tribunal dehan katak nia la sala ba kazu ne’ebé nia komete.
“Maibe ha’u tenke dehan katak ligadu ho situasaun hanesan ne’e ha’u hetan prejuizu maka’as, maibé ha’u hanoin ha’u-nia naran ida nama baik ne’e folin la’ek liu, laiha folin. Nama baik ne’e ita labele sosa ho juta mós labele sosa, desde ke nia di’ak ne’e di’ak duni,” dehan deputadu ne’e.
Deputadu ne’e konsidera, desizaun Tribunl Dili ne’ebé kondena nia ba krime partisipasun ekonomia ne’e la tetu ho didi’ak no la respeitu ba ema-nia naran di’ak.
“Ema halo naran aat ne’e, ema ne’e tanba laiha de’it respeitu ba ema seluk, hodi lori buat ne’ebé mak ema ruma nia naran fo’er. Tanba ida ne’e mak ha’u hanoin husu par ema hatene respeita malu, halo servisu ne’e halo ho loloos, labele iha tendensia odiu, vigansa pesoal ho hahalok sira halo ema seluk tenkeser selu tusan,” nia hatete.
Tuir nia, se atu halo fila-fali rekuperasaun naran di’ak, la’os ema ida halo foer nia naran mak atu selu, maibé estadu mak selu, signifika povu mak selu.
“Se ita koalia katak ema nia aktu ne’e hasai povu ida nia direitu, tanba saida mak ha’u tenke ba husu atu selu tan fila fali? Ne’ebé ha’u sei la halo ida ne’e, atu halo rekuperasaun ba naran di’ak ne’e. Ha’u nem atu ba husu fila fali tenke ser atu selu ha’u-nia naran di’ak.”
Tuir nia, ninia desizaun ne’ebé nia foti bainhira sei asume kargu nu’udar Ministru la’os ba ema sira ne’ebé mak riku, maibé nia halo desizaun ba ema ne’ebé mak fa’an masin iha Atabae.
Kalohan hatutan, nia kria kondisaun ba ema ne’ebé tein masin hodi moderniza ninia atividade atu bele hetan rendimentu ne’ebé di’ak.
Iha fatin ketak, defeza husi Kalohan, Pedro Camoes afirma, ninia kliente sei la uza nia direitu hodi husu indinimizasaun ba kualker ema, maske nia sente ofendidu durante prosesu julgamentu iha tribunal to’o desizaun husi Tribunál Rekursu hodi absolve total nia husi pena ne’ebé Tribunál Dili aplika ba nia.
“Ate a data nia (Kalohan) sente ofendidu no la kontente, maibé nia la uza direitu hodi hetan benefisiu seluk ida ba an, ba nia onra, ba nia familia no ba nia Partidu Politiku. Fiar de’it, nia la halo,” dehan defeza ne’e.
