Xefe Estadu hatutan, iha Loron Nasional Juventude nian ida-ne’e, marka mós aniversáriu masakre Santa Cruz ba dala-32, loron ne’e mak loron ida ne’ebé hamosu memória doloroza, maibé mós hatudu reziliénsia no forsa husi joven sira ba autodeterminasaun.
Ohin loron, haree fali ba kotuk, ba sira ne’ebé uluk luta. Masakre Santa Cruz ne’e sai nuudar ta’uk iha ita-nia istória, ne’ebé fó-hanoin mós katak susar no dala barak susar tebes atu buka liberdade no justisa. Maibé, ne'e mós sai nu'udar sasin ba foin-sa'e Timor-oan sira-nia aten-brani.
ha loron 12 Novembru 1991, foin-sa’e sira iha liña oin hodi fó sira-nia isin ba mate, ho aten-brani defende ideál sira kona-bá liberdade no determinasaun ba ukun rasik an. Maski akontesimentu sira-ne’e trájiku, maibé ida-ne’e forma ida bá nasaun no fó-hanoin kona-bá folin bá independénsia.
“Ohin, ami selebra ho imi, jerasaun foin-sa’e Timor-Leste nian. Imi mak nasaun nia forsa atu lori ukun iha independénsia ne’ebé ho luta makas mak hetan mesmu susar. Foin-sa’e sira hanesan ahi-oan ne’ebé halakan viziaun nasaun nian ne’ebé justu, prosperu no únidu. Nu’udar nasaun ida, ita hasoru dezafiu kompleksu sira, hahú husi kiak multidimensional to’o inseguransa ai-han, liuliu hafoin akontesimentu globál sira hanesan pandemia Covid-19, funu iha Ukrainia, no rezulta presaun inflasaun. Imi, foin-sa’e sira husi Timor-Leste, iha papél importante ida atu hala’o iha senáriu ida-ne’e.”Online INDEPENDENTE sita iha komunikadu, (12/11/23).
Xefe Estadu haktuir, hamutuk ho Assosiasaun Nasaun Sudeste Aziatiku (ASEAN) no Organizasaun Mundial Komérsiu (OMK) nu’udár oportunidade úniku ida ba Timoroan hotu. Ida-ne’e mak tempu ne’ebé emprezáriu joven sira, mane no feto sira, bele lidera projetu inovadór sira ne’ebé sei promove nasaun ne’e iha nível internasionál.
“Ohin, ha’u husu ba joven Timor-oan hotu atu envolve an ativu iha konstrusaun futuru Timor-Leste nian. Sai ajente ba mudansa, vizaun sira ne’ebé transforma dezafiu ba oportunidade. Loron Nasional Juventude la’ós de’it kona-ba selebrasaun maibé mós kona-ba foti responsabilidade ba liman-rohan ne’ebé ita simu ona,” Tenik PR Horta.
Entretantu, PR Horta husu ba joven sira hotu atu haree ba futuru ho esperansa, determinasaun no kompromisu ne’ebé metin ba ideál liberdade no justisa nian, tanba ne’e ema barak mak fó sira-nia moris, erói no martir sira iha loron 12 Novembru 1991. Hamutuk, harii Timor-Leste ida-ne’ebé fó onra ba pasadu, hasoru dezafiu sira ohin loron no prepara futuru ida ne’ebé vibrante.
