Kandidatu Primeiru Ministru, Mari Alkatiri hatete, antes ne'e membru Comité Central FRETILIN (CCF) mós nomeia ona, inklui ema barak la’ós husi partidu FRETILIN mós husu atu bele asume kargu Xefe Governu.

Nia dehan, ema barak mak husu atu sekretaria jerál ne’e bele ba asume pasta primeiru ministru no sira husi bloku mós aseita ona.

"Ema hotu husu ha'u atu sai primeiru ministru, maibé ha'u mak sente oinsá. Maibé, depois ha'u kontaktu ho personalidade balun ikus mai ha'u bele aseita ba PM", dehan Alkatiri iha CCF-Komoro, horisehik.

Enkontru ne'ebé partidu koligasaun halo ne’e ho objetivu atu prepara dokumentu kona-ba naran kandidatu primeiru ministru atu entrega ba Prezidente Repúblika.

Tuir planu, bloku koligasaun sei entrega proposta naran primeiru ministru nian ba aprezenta ba Prezidente Repúblika, Kuarta (13/9), ohin.

Tuir Alkatiri, kuandu nia sai primeiru ministru promete sei hakiik postura governu. Tanba ne’e, iha governu sei laiha vise-primeiru ministru no sei estabelese de'it ministru koordenadór sira.

Alende ne'e, kolokasaun ba membru governu ba iha kada ministériu ne'e sei tuir proporsionalidade no méritu, kuandu uza proporsionalidade mak ema la too bloku koligasaun tenke fihir fali ema seluk ho méritu atu bele mai asume kargu ministru ka sekretária estadu.

Bloku koligasaun ne’e diskute ona ema ne'ebé lidera, maibé seidauk fó sai naran sira ne'ebé atu ba tuur iha ministériu ho razaun katak Prezidente Repúblika seidauk indijita PM.

Alende ne'e kuandu iha PR indijita ona Alkatiri sai primeiru ministru maka nia sei hili nia membru governu hodi prienxe instituisaun governu sira.