Reitor Universidade da Paz (UNPAZ), Adolmando Amaral hatete, deputadu Parlamentu Nasionál (PN) presiza duni karreta hodi fasilita sira-nia servisu, maibé daudauk ne’e deputadu na’in 65 iha hotu ona karreta.

Tan ne’e, Adolmando kestiona, tanba sa mak presiza sosa tan karreta foun ba deputadu sira, liu-liu iha sira-nia mandatu ikus.

"Ida ne'e la urijente Parlamentu atu sosa tan karreta ba deputadu sira tanba sira-nia mandatu mós hela fulan hira de'it, besik hotu ona, la'os to'o tinan tan, agora sira presiza karreta ne'e atu sosializasaun ba saida nian? Sosa agora mós deputadu foun mai mak uza, la'os sira," dehan Adolmando ba jornalista jornal INDEPENDENTE via telefone, Sesta (30/09).

Tuir nia, karreta ne’ebé daudauk ne’e deputadu sira uza seidauk to’o tinan lima no sei bele atu halo operasaun.

“Se agora Parlamentu nia orsamentu privativu ne'e hanoin atu aumenta tan karreta, entaun tenke iha esklaresimentu ida klean ba públiku no povu. Sira labele dehan katak sira reprezenta ona povu bé buat povu nian ne'e sira tau konfome sira-nia gostu de'it, tanba ida ne'e mak hanoin sira tenke esklarese ba públiku.”

Reitor ne’e mós husu kona-ba paradeiru husi karreta ne’ebé eis deputadu sira foti.

Nia dehan, uluk husi deputadu na’in 65, na’in 30 resin mak entrega karreta no sira seluk to’o ohin sei uza hela.

“Karreta sira uluk ne'e agora nia paradeiru iha ne'ebé? Tama ona ba leilaun ka oinsá. Se seidauk, nusa la halo manutensaun? Karik leilaun ona, osan ne'e iha ne'ebé par aloka osan ne'e ba sosa karreta foun, la'os foti tan osan husi Fundu Petroliferu ne'e,” dehan nia.

Nia kestiona, tanba sa mak deputadu sira iha hela karreta maibé tenke sosa tan karreta foun ba sira.

“Sera ke iha Timor, sira de'it mak tenke hetan previleziu ida ne'e? Ha'u-nia hanoin reprezentante povu sira labele uza povu ne'e ba sira-nia interese, halo netik buat ruma ba povu ne'e ho kondisaun ne'ebé mak iha ona, la'os ida iha tiha ona sira hakarak aumenta tan, ne'e mak hahalok ne'ebé hakarak estraga nasaun," katak nia.

Entretantu, iha planu orsamentu privativu Parlamentu Nasionál ba tinan fiskal 2023 prevee mós orsamentu atu sosa karreta Pajero Sport 30 ba deputadu sira.

Sekretariu Jeral Parlamentu Nasionál, Adelino Afonso de Jesus hatete, iha orsamentu privativu PN nia prevee ona osan ba sosa karreta foun.

"Tanba atu hola tan karreta 30, tanba karreta Pajero Sport 35 iha tiha ona, sosa tan 30 atu kompleta 65, ho razaun ida ne'e mak osan ne'e sa'e ba millaun $17," dehan nia, iha Parlamentu Nasionál, Kinta (29/09).

Kona-ba total osan ne’ebé prevee ba sosa karreta 30 ne’e, Adelino rekuza atu fó sai númeru.

"Karreta sei fó ba sira ne'ebé mak seidauk iha karreta, 35 ne'ebé mak sira simu ona, sira kontente ona ho pajero sport, agora ida mai ne'e hela 30 ne'ebé mak seidauk simu, sira bele simu," dehan nia.

Adelino hatutan, iha tetu orsamentu privativu PN ba tinan 2023 husi Ministériu Finansas hanesan nafatin ho tinan 2022, millaun $16,210,224,00, maibé tanba iha nesesidade ne’ebé labele adia nune’e hasa’e ba millaun $17 resin.

Orsamentu privativu PN ne’e, nia dehan, submete ona ba Ministériu Finansas no daudaun ne’e iha Konsellu Ministru nune’e la kleur tán governu sei haruka mai PN atu halo diskusaun no aprovasaun.

Entretantu, iha tinan 2019, Parlamentu Nasionál sosa ona karreta Pajero Sport unidade 35 ba deputadu sira.

Karreta hirak ne’e distribui ba deputadu husi kada bankada, hanesan: Bankada Fretilin hetan karreta 12, CNRT hetan karreta 9, PLP hetan karreta 5, Khunto hetan karreta 3, PD hetan karreta 3, PUDD hetan karreta ida, UDT hetan karreta ida no Frente Mudansa hetan karreta ida.