Prosesu atu sosa lixu fatin ne'e prosesu konkursu MAE halo hotu ona, no iha tempu badak sei to'o mai Timor, ekipamentu hirak ne'e hamutuk 4.000.

"Planu monta kontentór sira ne'e konkursu halo hotu ona no kompañia ida manán ne'e mós iha ona. Agora kompañia sira sei sosa hela kontentór no karreta sira tula ne'e, ha'u fiar fulan haat lima sasán sira ne'e to'o sei monta iha dalan públiku sira," Ministru Administrasaun Estatál (MAE) Miguel Pereira de Carvalho hateten hafoin reuniaun Konsellu Ministru iha Palásiu Governu, Kuarta (28/09/2022).

Fatin sira ne'ebé mak identifikadu ne'e kuaze iha Dili laran, hotu-hotu purvolta 178 kilometru dalan Dili laran ne'e sei monta hotu kontentór fatin lixu.

Bele dehan katak 178 kilometru ne'e kobre mós iha bairu sira, liu-liu bairu ida ne'ebé mak lixu ne'e sempre naklekar arbiru de'it tanba lixu fatin laiha.

"Problema lixu iha Dili laran tanba fatin atu soe lixu laiha, ita boot sira la'o haree ema halo ezersísiu la'o ba to'o iha Tasi tolu kaer masa ida hemu bee hotu atu soe lixu ne'e fatin laiha. Entaun ita tenke rezolve uluk fatin soe lixu, ne'ebé kaisoti lixu sira iha dalan ona," nia dehan.

MAE hanoin espera katak bainhira kontentór sira ne'e to’o mai sei rezolve problema lixu iha Dili laran, no fiar katak ema hotu-hotu bele iha konsiénsia ona soe lixu tuir nia fatin.