Prezidente Autoridade Munisipiu Dili, Guilhermina Filomena Saldanha, promote sei obedese ba kontituisaun RDTL no lei, ho responsabilidade tomak hodi servi povu no nasaun durante nia mandatu.

“Ha'u jura sei obedese tuir regulamentu ne'ebé iha, ho funsaun ne’ebé fó ona mai ha'u no sei tau as interese nasaun nian, hodi servi komunidade no povu ho responsabilidade, onestidade no profesional,”dehan nia salaun Administrasaun Munisipál Dili.

Entretantu, Ministru Administrasaun Estatal Miguel Pereira de Carvalho husu ba Prezidente Autoridade Munisipál foun Dili tenke servisu ho responsabilidade, liu-liu mantein koperasaun ho parte hotu, hodi kontribui ba dezenvolvimentu kapital nasaun nian.

Enkuantu, kandidatu ne’ebé liu iha teste eskrita ba pozisaun PAM Dili hamutuk na’in 6 kompostu husi mane na’in 4 no feto na’in 2. Husi feto na’in rua ne’e mak, Guilhermina Filomena Saldanha ho valor 13,6 no Ivete de Fatima Sarmentu de Oliveira ho valor 13,2.

Nune’e, Konsellu Ministru deside hili Guilhermina Filomena Saldanha hodi lidera Munisipál Dili to’o tinan lima.