Prezidente Repúblika (PR) rekoñese serimónia ida ne’e hodi hatudu nu’udar sasin domin ba pátria, ba koezaun nasionál no mós instituisaun militár nia-importánsia ba hotu-hotu.
Tan ne’e, haksolok-aan hamutuk ho pasadu ne’ebé kesi metin hotu-hotu no ba beibeik, ohin haksolok-aan ho valór ne’ebé hametin hotu-hotu ne'ebé hakarak harii Timor-Leste, nu’udar nasaun livre, soberania no independente.
“Brigadeiru-Jenerál FALINTIL-FDTL sira ne’ebé hetan promosaun ohin sira esforsu no dedikasaun tomak, iha misaun sira ne’ebé ida-idak simu, husi hori-uluk to’o ohin loron merese rekoñesimentu públiku, dehan PR Lú-Olo, iha nia-diskursu iha promosaun diviza ba Brigadeiru Jenerál na’in haat, iha Palásiu Prezidensiál Bairru-Pité, horisehik.
Nia lembra fila-fali tinan rua nulu resin haat nia laran, biar ho kondisaun luta susar tebes, FALINTIL no povu Timor-Leste fó-aan tomak, ho espíritu patriótiku, hodi hala’o rezisténsia metin hasoru forsa ida, ho kbiit boot liu.
Timor-Leste restaura ona independénsia nasionál, nune’e Estadu iha responsabilidade atu hala’o lala’ok importante oioin.
Lala’ok ida maka halo omenajen ba maluk sira ne’ebé fó-aan no mate durante luta libertasaun hodi ohin loron moris iha Timor-Leste livre no independente.
Ida seluk maka oinsá Estadu rekoñese maluk sira ne’ebé hala’o duni sira-nia responsabilidade hori-uluk no sei hamutuk hela to’o ohin loron.
Maluk sira ne’e halo sakrifísiu oioin no fó-aan tomak ba luta atu ukun rasik aan. Nune’e, sira manán direitu atu Estadu rekoñese sira, haree liuliu ba kritériu tuir mai: méritu, barani no fó-aan tomak.
“Ha’u-nia kna’ar, nu’udar Komandante Supremu Forsa Armada, espesiál tebetebes, la sukat ho knaar sira seluk ne’ebé ha’u iha, nu’udar Prezidente Repúblika. Tuir Konstituisaun RDTL no lei sira seluk, liuliu, Lei ba Defeza Nasionál, ha’u iha kompeténsia rasik balun”, dehan PR Lú-Olo.
Kompeténsia ne’ebé Xefe Estadu iha mesak maka halo promosaun ba militár F-FDTL sira ba postu ofisiál jenerál no promosaun ofisiál jenerál sira-nian, hafoin simu proposta husi Konsellu Ministru. Kompeténsia rasik ne’e mai husi knaar, nu’udar Komandante Supremu F-FDTL
Tuir lei, kritériu distinsaun maka fó dalan ba Estadu halo promosaun ba ofisiál jenerál sira ne’ebé hatudu maka'as komandu, diresaun ka xefia ho nivel kualidade aas tebetebes, iha sira-nia lala’ok militár ne’ebé fó glória ba pátria ka prestíjiu ba instituisaun militár.
Nune’e, justu tebetebes Komandante Supremu fó re-koñesimentu públiku iha serimónia ida ne’e, ho distintivu ofisiál jenerál ba Brigadeiru Jenerál foun, iha FALINTIL- Forsa Defeza Timor-Leste.
Jenerál sira ne’ebé Estadu promove ohin, pertense ba jerasaun ne’ebé sei iha kbiit no matenek atu fó ba rai doben ne’e. Hothotu, liuliu joven timoroan sira, fiar no admira sira tebetebes.
Jenerál sira ne’e iha kapasidade lideransa, esperiénsia, koñesimentu no motivasaun atu simu dezafiu foun sira ne’ebé kontribui ba dezenvolvimentu, koezaun no prestíjiu Forsa Defeza Timor-Leste nian no ba país.
Forsa konvensionál la'ós harii naranaran de’it, maibé tuir prosesu ida. Prosesu ne’ebé naruk tebes no la'ós fasil, ne’ebé presiza nafatin kontribuisaun husi hotu-hotu, katuas, ferik no foin-sa’e sira hodi hametin prosesu ne’e ho esperiénsia mai husi rezisténsia timorense. Ho valór FALINTIL nian maka harii instituisaun militár ne’ebé bele kaer metin interese aas Estadu nian no seguransa Nasaun nian.
Iha fatin hanesan, Xefe Estadu Maiór F-FDTL, Majór Jenerál Lere Anan Timur hatete, promosaun ba brigadeiru na’in haat ne’e hanesan promosaun distinsaun ne’ebé tenke rekoñese, entaun Estadu valoriza sira nia-kontribuisaun ne’ebé harii Estadu no nasaun TL.
Tanba, durante iha 24 nia laran no to’o ohin loron mós sira kontinua nafatin kontribui ba iha forsa armada, entaun sira merese duni hetan promosaun ba Brigadeiru Jenerál nune’e lori instituisaun F-FDTL ne’e dezenvolve di'ak liután.
Nune’e, mós Brigadeiru Jenerál, ‘Falur Rate Laek’ dehan, atu hetan Brigadeiru Jenerál la'ós buat fasil, to’os no tadan ne’e lori prosesu ne’ebé naruk to’o ohin loron.
Lori tempu naruk nia laran no dezafiu durante iha ai-laran, maski laiha akademia militár maibé ho kapasidade ne’ebé bele hakat ba to’o iha Brigadeiru Jenerál.
