Kordenador Forsa Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, hatete, iha loron 7 Novembru 2021, kazu foun laiha no taxa positividade 0%.

Kobertura vasina doze kompletu ba sidadaun elejivel ne’ebé iha teritoriu nasional atinji ona pursentu 49,5 (49,5%). Nune’e, kazu ativu iha loron 7 Novembru hela na’in 5.

“Ohin (08/11) kazu foun Covid-19 laiha no kazu rekuperadu mós laiha, maibé kazu ativu iha Izolamentu hela na’in lima,”dehan nia iha komunikadu ne’ebé Online INDEPENDENTE asesu, segunda ne’e (08/11).

Ho nune’e, komulativu kazu konfirmadu sura husi loron 21 fulan-Marsu tinan 2020 to’o 08 fulan-Novembru 2021 hamutuk 19.799 no ema ne’ebé mate ho Covid-19 iha na’in 122.

Husi horseik (07/11) mai ohin, teste PCR ne’ebé Laboratóriu Nasional Saúde halo iha Dili hamutuk na’in 35, kompostu husi rastreiu aleatóriu na’in rua, viajen internasional na’in 32 no follow up iha kuarentena iha na’in ida.

Aleinde, teste PCR ne’ebé halo iha Munisipiu sira seluk, RAEOA no HNGV hamutuk na’in 140.

Enkuantu, sidadaun elejivel iha teritoriu nasional ne’ebé simu ona vasina doze kompletu atinji ona pursentu 49,6 (49.6%).

Iha loron 8 Novembru 2021, Izolamentu Lahane, HNGV no fatin seluk tan hala’o tratamentu ospitalizadu ba kazu detetadu positivu iha na’in haat, kompostu husi kazu moderadu na’in ida no kazu leve na’in tolu.

Entretantu, iha loron 1 to’o 3 fulan-Novembru 2021, SIJK larejista mós kazu foun Covid-19.