Tuir observasaun jornalista jornal INDEPENDENTE, iha loron dahuluk kampaña kandidatu PR númeru 8, Lere Anan Timur, iha munisipiu Manatuto, inan-aman balun ne’ebé partisipa iha kampaña ba Lere lori mós sira-nia oan.

Lere hala’o abertura ba kampaña eleitoral iha Munisípiu Manatutu. Apoiante husi kandidatu Lere ne’ebé partisipa mai husi Postu Administrativu Manatu Vila, Laleia, Laklubar, Soibada, Natarbora no Laklo.

Iha fatin kampaña ne’ebé realiza iha Manatuto villa, ne’ebé hetan mós observasaun husi Komisaun Nasionál Eleisaun no sosiadade sivil sira, labarik balun mós hola parte.

Molok ne’e, Portavoz Institutu Para Defeza dos Direitu Criansas (INDDICA), Marciana Pereira, bolu atensaun ba kandidatu PR sira atu labele mobiliza labarik sira hodi envolve iha kampaña.

Nia dehan, INDDICA hamutuk ho nia parseiru hotu ne'ebé servisu ba direitu no protesaun ba labarik, rekomenda ba kandidatu, partidu politiku no entidades sira hotu atu asegura no fó protesaun ba labarik husi risku sira durante periòdu kampana eleisaun. 

“Ami husu ba eskipa organizasaun husi kandidatu no partidu politiku nian hodi kria mekanizmu atu labele husik labarik tama iha area kampaña politika nian no halo komunikasaun ho baze hodi informa komunidade lokal kona-ba bandu partisipasaun labarik,” dehan nia.