Diretór Ezekutivu Forum Organizasaun Naun Governanmental Timor-Leste (FONGTIL), Daniel Santos do Carmo hateten, governu agora loke fronteira iha risku tanba ema tama-sai.

“Ita-nia kondisaun atu atua iha fronteira sira liuliu term scanner no fasilidade sira seluk sei minimu tebes, entaun bainhira ita loke fronteira maibé la hasae kontrolu bele iha risku virus ne’e tama fali mai,” dehan nia, iha knaar fatin, Kaikoli, horisehik.

Tanba ne’e, sosiédade sivil hanoin katak estadu emerjensia maibé governu tenke reforsa iha fronteira rai maran no tasi.

Nia dehan, Governu ko’alia hela dehan tenke reforsa iha fronteira maibé asaun ne’e FONGTIL la haree. Tuir ekipa monitoriu FONGTIL iha terrenu deskobre kondisaun mais pior, lampada de’it ba polísia sira atu halo kontrolla atu evita ema ilegal mós difisil.

Agora se loke loron ida tomak ne’e di’ak tanba kestaun ekonomia ne’e nesesidade duni, maibé oinsá maka atu hasae kontrolu.

“Rekomendasaun OSM no Ministériu Saúde hasai ne’e tenke kumpre, buat sira term scanner, distansia sosiál, distansia fiziku, kuarentena obrigatóriu, buat sira ne’e tenke aplika nafatin atu ita bele kontrola,” tenik Daniel.

Intervensaun másimu iha fronteira sira liuliu liga ho rekomendasaun ne’e no mós saida maka fasilidade balun governu halo hanesan uma ba kuarentena ne’eba kondisaun la tuir padraun rekomendasaun OMS nian tanba kulisaun nahe iha rai de’it, entaun oinsá maka atu kumpre padraun ne’e.